തിരുവനന്തപുരം: തദ്ദേശസ്ഥാപനങ്ങളിലെ അഴിമതിയും കെടുകാര്യസ്ഥതയും കേന്ദ്ര പദ്ധതികള് അട്ടിമറിക്കുന്നതുമായ സംഭവങ്ങള് പുറത്തുകൊണ്ടുവരുന്ന പ്രക്ഷോഭങ്ങള് ബിജെപി ആരംഭിക്കും. ജനങ്ങള്ക്ക് നേരിട്ട് എത്തുന്ന പഞ്ചായത്ത് തലത്തിലുള്ള പല കേന്ദ്ര പദ്ധതികളും കൃത്യമായി നടപ്പിലാക്കുന്നില്ല. കേന്ദ്ര ഫണ്ട് പലതും ചിലവഴിക്കുന്നില്ല.
മാരാര്ജി ഭവനില് നടന്ന ബിജെപി സംസ്ഥാന ഭാരവാഹി യോഗത്തിന്റെ വിശദാംശങ്ങള് സംബന്ധിച്ച് മാധ്യമങ്ങളോട് സംസാരിക്കവെ സെക്രട്ടറിമാരായ എം. ടി. രമേശും അനൂപ് ആന്റണി ജോസഫുമാണ് ഇക്കാര്യങ്ങള് പറഞ്ഞത്.
കേരളത്തിലെ പൊതുവായ രാഷ്ട്രീയ സാഹചര്യത്തെ വിലയിരുത്തിയ പ്രമേയം സംസ്ഥാന ഭാരവാഹി യോഗത്തില് അവതരിപ്പിച്ചെന്ന് എം. ടി. രമേശ് പറഞ്ഞു.പ്രധാനമായും കേരളത്തില് ജനങ്ങള് ആഗ്രഹിക്കുന്ന മാറ്റത്തെപ്പറ്റിയുള്ളതായിരുന്നു പ്രമേയം. കേരളത്തിലെ ക്രിയാത്മക മുഖ്യ പ്രതിപക്ഷമായി ജനങ്ങള് ബിജെപിയെ കാണുന്നു എന്നും പ്രമേയത്തില് വിലയിരുത്തി.
തദ്ദേശ തെരഞ്ഞെടുപ്പിന്റെ പ്രവര്ത്തനമാണ് പ്രധാനമായും ചര്ച്ചയായത്. വികസിത കേരളം സാക്ഷാത്കരിക്കുന്നതിന്റെ ആദ്യ ചുവടുവെപ്പാകും ത്രിതല പഞ്ചായത്ത് തെരഞ്ഞെടുപ്പുകള്. അതിനായി 100 ദിവസം നീണ്ടുനില്ക്കുന്ന വിപുലമായ റോഡ് മാപ്പ് സംസ്ഥാന ഭാരവാഹി യോഗം ചര്ച്ച ചെയ്ത് അംഗീകരിച്ചു. കേരളത്തിലെ 30 സംഘടനാ ജില്ലകളിലും പ്രഭാരിമാരെ നിശ്ചയിച്ചു. അവരുടെ നേതൃത്വത്തില് താഴെത്തട്ടിലുള്ള പ്രവര്ത്തനങ്ങള് ഏകോപിപ്പിക്കുന്നതാവും കര്മ്മപദ്ധതി.
ആഗസ്റ്റ് ഒന്ന് മുതല് 10 വരെ എല്ലാ വാര്ഡുകളിലും വിപുലമായ വാര്ഡ് സമ്മേളനങ്ങള് നടത്തും. പ്രാദേശികമായ വികസന പ്രശ്നങ്ങള് ചര്ച്ചയാകും. രണ്ട് മുന്നണികളും ജനങ്ങളെ വഞ്ചിക്കുന്നതിന്റെ തെളിവുകള് നിരത്തിയ കുറ്റപത്രം ബിജെപി പുറത്തിറക്കും. ഇരുപതിനായിരം വാര്ഡുകളില് സമ്മേളനങ്ങള് നടത്താനാണ് ലക്ഷ്യമിടുന്നത്. ആഗസ്റ്റ് 15ന് വാര്ഡ് കേന്ദ്രങ്ങളില് സ്വാഭിമാന ത്രിവര്ണ റാലി ശോഭായാത്രകള് നടത്തും. പരിപാടിയില് പ്രവര്ത്തകര് വികസിത കേരളം പ്രതിജ്ഞ എടുക്കും.
വിദ്യാഭ്യാസ മേഖലയിലെ സമ്പൂര്ണ തകര്ച്ചയ്ക്ക് കാരണം സംസ്ഥാന സര്ക്കാര് തന്നെയാണ്. സിപിഎമ്മിന്റെ പെറ്റി പൊളിറ്റിക്സിനുള്ള വേദിയാക്കി സര്വകലാശാലകളെ മാറ്റുന്നു. വൃത്തികെട്ട തരംതാണ രാഷ്ട്രീയമാണ് സര്ക്കാര് സര്വകലാശാലകളില് നടത്തുന്നത്. ആ നടപടിയില് നിന്ന് സിപിഎമ്മും സര്ക്കാരും പിന്നോട്ട് പോകണം. സര്ക്കാരും ഗവര്ണറും സിപിഎമ്മും തമ്മിലുള്ള വിഷയത്തില് ബിജെപി കക്ഷിയല്ല. എന്നാല് കലാലയങ്ങളെ സംഘര്ഷകേന്ദ്രങ്ങള് ആക്കി മാറ്റുന്നതിലൂടെ വിദ്യാര്ഥികള് കേരളം വിട്ടുപോകുന്നു എന്നും എം. ടി. രമേശ് വിശദീകരിച്ചു.
യോഗം സംസ്ഥാന അധ്യക്ഷന് രാജീവ് ചന്ദ്രശേഖര് ഉദ്ഘാടനം ചെയ്തു. നിയുക്ത രാജ്യസഭാ എം. പി. സദാനന്ദന് മാസ്റ്ററിന് ബിജെപി സംസ്ഥാന നേതൃത്വത്തിന്റെ ഔദ്യോഗിക സ്വീകരണവും ചടങ്ങില് നല്കി. വിമാനത്താവളത്തില് കുമ്മനം രാജശേഖരന്, അഡ്വ എസ് സുരേഷ്, കരമന ജയന് എന്നിവര് സദാനന്ദന് മാസ്റ്ററെ സ്വീകരിച്ചു. മാരാര്ജി ഭവനിലേക്കെത്തിയ മാസ്റ്ററെ സംസ്ഥാന അധ്യക്ഷന്റെ നേതൃത്വത്തില് മുഴുവന് സംസ്ഥാന നേതാക്കളും ചേര്ന്ന് ഓഫീസിലേക്ക് സ്വാഗതം ചെയ്തു.
