തിരുവനന്തപുരം: സംസ്ഥാനത്ത് മന്ത്രിമാരുടെയും മറ്റ് ഭരണഘടനാ പദവിയിലുള്ളവരുടെയും പേഴ്സണല് സ്റ്റാഫ് പെന്ഷന് വാങ്ങുന്നതിന് സര്ക്കാര് പുതിയ നിബന്ധന കര്ശനമാക്കി. പെന്ഷന് തുടര്ന്നും ലഭിക്കുന്നതിന്, ഗുണഭോക്താക്കള് ഓരോ വര്ഷവും തങ്ങള് മറ്റ് ജോലികള്ക്കൊന്നും പോകുന്നില്ലെന്ന് തെളിയിക്കുന്ന ‘തൊഴില്രഹിത സര്ട്ടിഫിക്കറ്റ്’ ഹാജരാക്കണം. വില്ലേജ് ഓഫീസറാണ് ഈ സര്ട്ടിഫിക്കറ്റ് നല്കേണ്ടത്. ഇതുസംബന്ധിച്ച് ധനവകുപ്പ് ഉത്തരവിറക്കി.
അക്കൗണ്ടന്റ് ജനറലിന്റെ (എ.ജി.) റിപ്പോര്ട്ടുകളില് പലതവണ ആവര്ത്തിച്ചുള്ള നിര്ദ്ദേശത്തെ തുടര്ന്നാണ് ഈ നടപടി. പേഴ്സണല് സ്റ്റാഫ് പെന്ഷന് വാങ്ങുന്ന പലരും മറ്റ് ജോലികള് ചെയ്ത് വരുമാനം നേടുന്നുണ്ടെന്നും ഇത് ചട്ടവിരുദ്ധമാണെന്നും എ.ജി. ചൂണ്ടിക്കാട്ടിയിരുന്നു. ആറുമാസം കൂടുമ്പോള് സര്ട്ടിഫിക്കറ്റ് ഹാജരാക്കണമെന്നായിരുന്നു എ.ജി.യുടെ ശുപാര്ശയെങ്കിലും വര്ഷത്തില് ഒരിക്കല് ലൈഫ് സര്ട്ടിഫിക്കറ്റിനൊപ്പം നല്കിയാല് മതിയെന്നാണ് ധനവകുപ്പിന്റെ ഇപ്പോഴത്തെ ഉത്തരവ്.
ആര്ക്കൊക്കെ ബാധകം
1.70 വയസില് താഴെയുള്ള പേഴ്സണല് സ്റ്റാഫ് പെന്ഷന്കാര്.
2.പേഴ്സണല് സ്റ്റാഫിന്റെ മരണശേഷം കുടുംബപെന്ഷന് വാങ്ങുന്നവര്.
3.18 മുതല് 25 വയസു വരെയുള്ള മറ്റ് കുടുംബപെന്ഷന്കാര്.
രാജ്യത്തിനകത്തോ പുറത്തോ സര്ക്കാര്, സ്വകാര്യം, സഹകരണ, തദ്ദേശ സ്ഥാപനങ്ങള് തുടങ്ങി ഒരു മേഖലയിലും ജോലി ചെയ്യുന്നില്ലെന്ന് സ്വയം സാക്ഷ്യപ്പെടുത്തി വില്ലേജ് ഓഫീസര്ക്ക് നല്കുന്ന അപേക്ഷയുടെ അടിസ്ഥാനത്തിലായിരിക്കും സര്ട്ടിഫിക്കറ്റ് ലഭിക്കുക. ഈ സര്ട്ടിഫിക്കറ്റ് ട്രഷറിയില് സമര്പ്പിച്ചാല് മാത്രമേ അടുത്ത വര്ഷം മുതല് പെന്ഷന് തുടര്ന്ന് ലഭിക്കുകയുള്ളൂ.
