സൂംബ, സ്‌കൂള്‍ സമയമാറ്റം; സമസ്തയ്‌ക്ക് മുന്നില്‍ മുട്ടുവിറച്ച് സര്‍ക്കാര്‍, ഗുരുപൂജാ വിവാദം നാണക്കേട് മറയ്‌ക്കാന്‍

തിരുവനന്തപുരം: കൊട്ടിഘോഷിച്ച് നടപ്പാക്കിയ സൂംബ പരിശീലനത്തിലും സ്‌കൂള്‍ സമയമാറ്റത്തിലും സമസ്തയുടെ എതിര്‍പ്പിന് മുന്നില്‍ മുട്ടുവിറച്ച് പിണറായി സര്‍ക്കാര്‍. സൂംബ പരിശീലനം നല്‍കണമെന്ന നിര്‍ബന്ധത്തില്‍ നിന്ന് സര്‍ക്കാര്‍ പിന്നോട്ട്. സ്‌കൂള്‍ സമയമാറ്റത്തിനും അനുനയ ശ്രമങ്ങളുമായി സര്‍ക്കാര്‍. പിന്നോട്ട് പോക്ക് ചര്‍ച്ചയാകാതിരിക്കാന്‍ ഗുരുപൂജയെ വിവാദമാക്കി വിദ്യാഭ്യാസമന്ത്രി വി. ശിവന്‍കുട്ടി.

ഹൈസ്‌കൂളില്‍ മാത്രമാണ് 15 മിനിട്ട് രാവിലെയും 15 മിനിട്ട് വൈകിട്ടും അധ്യയന സമയം വര്‍ദ്ധിപ്പിച്ച് ജൂണ്‍ 11ന് ഉത്തരവിറക്കിയത്. ഇത് ഒരുകാരണവശാലും മാറ്റില്ലെന്നായിരുന്നു പലവട്ടം വിദ്യാഭ്യാസമന്ത്രി ആവര്‍ത്തിച്ചത്. സമസ്ത പ്രസിഡന്റ് മുഹമ്മദ് ജിഫ്രി മുത്തുക്കോയ തങ്ങള്‍ മുഖ്യമന്ത്രി പിണറായി വിജയനോട് പരസ്യമായി തന്നെ എതിര്‍പ്പ് അറിയിച്ചു. സ്‌കൂള്‍ സമയമാറ്റം മതവിദ്യാഭ്യാസം നടത്തുന്നവര്‍ക്ക് ബുദ്ധിമുട്ടുണ്ടാക്കുമെന്ന്, സമസ്തയുടെ ചരിത്രം വിവരിക്കുന്ന പുസ്തകപ്രകാശനച്ചടങ്ങില്‍ വച്ച് മുഖ്യമന്ത്രിക്ക് നിവേദനവും നല്‍കി.

ഹൈക്കോടതി അംഗീകാരമുണ്ടെങ്കില്‍ സ്‌കൂള്‍ സമയമാറ്റ ഉത്തരവ് പിന്‍വലിക്കാമെന്ന് ആദ്യം പറഞ്ഞ മന്ത്രി നിലമ്പൂര്‍ ഉപതെരഞ്ഞെടുപ്പ് അടുത്തതോടെ സര്‍ക്കാരിന് കടുംപിടുത്തമില്ലെന്ന് നിലപാട് മയപ്പെടുത്തി. നിലമ്പൂര്‍ ഉപതെരഞ്ഞെടുപ്പ് കഴിഞ്ഞതോടെ സമസ്ത വീണ്ടും സ്‌കൂള്‍ സമയമാറ്റത്തിനെതിരെ രംഗത്തെത്തി. ആഗസ്ത് 5ന് കളക്‌ട്രേറ്റിന് മുന്നില്‍ ധര്‍ണയും സപ്തം. 30ന് സെക്രേട്ടറിയറ്റ് മാര്‍ച്ചും നടത്തുമെന്ന് പ്രഖ്യാപിച്ചു. ഇതിന് പിന്നാലെയാണ് ആര്‍ക്കും ബുദ്ധിമുട്ടില്ലാത്ത ക്രമീകരണം നടത്താമെന്ന കീഴടങ്ങലുമായി വിദ്യാഭ്യാസമന്ത്രി രംഗത്തെത്തിയത്.

സംസ്ഥാനത്തെ സ്‌കൂള്‍ സമയക്രമീകരണവുമായി ബന്ധപ്പെട്ട് ഏതെങ്കിലും വിഭാഗത്തിന് ബുദ്ധിമുട്ടുണ്ടെങ്കില്‍ ചര്‍ച്ച നടത്തുമെന്നും സര്‍ക്കാരിന് കടുംപിടിത്തമില്ലെന്നും മന്ത്രി ശിവന്‍കുട്ടി ആവര്‍ത്തിച്ചു. ചിലര്‍ പരാതി മുഖ്യമന്ത്രിയുടെ ശ്രദ്ധയില്‍പ്പെടുത്തിയിട്ടുണ്ട്. ഹൈക്കോടതി അംഗീകാരം ഉണ്ടെങ്കില്‍ സ്‌കൂള്‍ സമയം കൂട്ടിയ ഉത്തരവ് പിന്‍വലിക്കാമെന്നും വിദ്യാഭ്യാസമന്ത്രി നിലപാട് തിരുത്തി. ചികിത്സ കഴിഞ്ഞ് മുഖ്യമന്ത്രി അമേരിക്കയില്‍ നിന്നും മടങ്ങിയെത്തിയ ശേഷം തീരുമാനം എടുക്കും.

സമസ്തയുടെ എതിര്‍പ്പിന് പിന്നാലെ സ്‌കൂളുകളില്‍ നിര്‍ബന്ധമാക്കിയ സൂംബയും പിന്‍വലിഞ്ഞ് തുടങ്ങിയിട്ടുണ്ട്. കായിക അധ്യാപകരുള്ള ഇടങ്ങളില്‍ പോലും സൂംബ നടത്തുന്നില്ല. തദ്ദേശ സ്വയംഭരണ തെരഞ്ഞെടുപ്പും നിയമസഭാ തെരഞ്ഞെടുപ്പും മുന്നില്‍ക്കണ്ട് സമസ്തയ്‌ക്ക് കീഴടങ്ങാനാണ് സര്‍ക്കാര്‍ നീക്കം. ഇതൊന്നും ചര്‍ച്ചയാകാതിരിക്കാന്‍ ഗുരുപൂജ വിവാദമാക്കുകയാണ് സിപിഎമ്മും സര്‍ക്കാരും.