ഇസ്ലാമാബാദ് : ഓപ്പറേഷൻ സിന്ദൂരിനുശേഷം ഇന്ത്യയും പാകിസ്ഥാനും തമ്മിലുള്ള ബന്ധം അത്ര നല്ലതല്ല. പഹൽഗാം ആക്രമണത്തിനു ഇന്ത്യ നൽകിയ തിരിച്ചടി പാകിസ്ഥാനിലെ ഭീകര ക്യാമ്പുകളെ തകർത്തെറിഞ്ഞു .
എന്നാൽ ഇപ്പോഴിതാ സോഷ്യൽ മീഡിയയിൽ പാകിസ്ഥാനിലെ ഒരു വീഡിയോ വൈറലാകുകയാണ് . ഒരു തരത്തിൽ പറഞ്ഞാൽ പാകിസ്ഥാന്റെ ചങ്കിൽ കൊള്ളുന്ന വീഡിയോ തന്നെയാണിത് . ഒരു ബ്രിട്ടീഷ് വ്ലോഗർ ഇന്ത്യൻ ക്രിക്കറ്റ് ടീമിന്റെ ജേഴ്‌സി ധരിച്ച് പാകിസ്ഥാനിലെ ലാഹോറിലെ തെരുവുകളിൽ വിലസി നടക്കുന്നതാണ് വീഡിയോ . ഇപ്പോൾ ഈ വീഡിയോ എല്ലായിടത്തും വൈറലായിരിക്കുകയാണ്. അലക്സ് വാണ്ടേഴ്‌സ് എന്ന ബ്രിട്ടീഷ് വ്ലോഗർ ഇത് തന്റെ ഇൻസ്റ്റാഗ്രാം അക്കൗണ്ടിൽ പങ്ക് വച്ചു . ടീം ഇന്ത്യയുടെ നീല ഡ്രീം11 ജേഴ്‌സി ധരിച്ച് അദ്ദേഹം ലാഹോറിലെ നാട്ടുകാർക്കൊപ്പം നടക്കുന്നത് ദൃശ്യങ്ങളിൽ കാണാം .
വീഡിയോ 2.5 ദശലക്ഷത്തിലധികം പേർ കണ്ടു. വീഡിയോയിൽ, വാണ്ടേഴ്‌സ് ലാഹോറിലെ വിവിധ പ്രദേശങ്ങളിൽ ചുറ്റിനടന്ന് പുഞ്ചിരിച്ചും കൈ കുലുക്കിയും നാട്ടുകാരുമായി സംസാരിക്കുന്നതും കാണാം. എന്നാൽ ഇന്ത്യൻ ജേഴ്‌സി ധരിച്ചിരുന്നതിനാൽ അലക്സ് വാണ്ടേഴ്‌സിനെ പലരും വിചിത്രമായാണ് നോക്കിയത്. എന്നാൽ എവിടെയും ആരും തന്നെ ആക്രമിക്കുകയോ ഉപദ്രവിക്കുകയോ ചെയ്ത സംഭവങ്ങളൊന്നുമില്ലെന്നും അദ്ദേഹം പറയുന്നു . വീഡിയോയിൽ, പാകിസ്ഥാനികൾ തനിക്ക് നൽകിയ സ്വീകരണത്തെക്കുറിച്ച് വാണ്ടേഴ്‌സ് പറയുന്നു. നിങ്ങൾ പാകിസ്ഥാനിൽ ഇന്ത്യൻ ഷർട്ട് ധരിച്ചാൽ ഒന്നും സംഭവിക്കില്ലെന്നും അദ്ദേഹം പറയുന്നു.
