മഞ്ചേശ്വരം: മഞ്ചേശ്വരം ഓര്‍ക്കാടിയില്‍ ഉറങ്ങിക്കിടന്ന അമ്മയെ മകന്‍ പെട്രോളൊഴിച്ച് തീ കൊളുത്തി കൊലപ്പെടുത്തി കുറ്റിക്കാട്ടില്‍ ഉപേക്ഷിച്ചു. വോര്‍ക്കാടി നല്ലെങ്കിയിലെ പരേതനായ ലൂയിസ് മുണ്ടാരയുടെ ഭാര്യ ഹില്‍ഡയാണ് (60) മരിച്ചത്. സംഭവത്തില്‍ മകന്‍ മെല്‍വിനെ പൊലീസ് തെരയുന്നു. മൃതദേഹം കുറ്റിക്കാട്ടില്‍ ഉപേക്ഷിച്ച ശേഷം അമ്മയ്‌ക്കു സുഖമില്ലെന്നു പറഞ്ഞ് അയല്‍പക്കത്തു താമസിക്കുന്ന ബന്ധുവായ ലോലിതയെയും വീട്ടിലേക്ക് വിളിച്ചുവരുത്തി പെട്രോളൊഴിച്ച് തീ കൊളുത്തി. ഇവരുടെ നിലവിളി കേട്ട് അയല്‍വാസികള്‍ ഓടിയെത്തിയപ്പോഴേയ്‌ക്കും മെല്‍വിന്‍ രക്ഷപ്പെട്ടിരുന്നു. സ്ഥലത്തെത്തിയ പോലീസും നാട്ടുകാരും നടത്തിയ തെരച്ചിലിലാണ് ഹില്‍ഡയുടെ മൃതദേഹം കുറ്റിക്കാട്ടില്‍ കണ്ടെത്തിയത്. മെല്‍വിന്‍ കെട്ടിട നിര്‍മ്മാണ തൊഴിലാളിയാണ്. സഹോദരന്‍ ആല്‍വിന്‍ വിദേശത്താണ്. പൊള്ളലേറ്റ ലോലിതയെ ആശുപത്രിയില്‍ പ്രവേശിപ്പിച്ചു.
