ന്യൂദൽഹി : ഇന്ത്യയുടെ ദേശീയ സുരക്ഷാ ഉപദേഷ്ടാവ് (എൻഎസ്എ) അജിത് ഡോവൽ തിങ്കളാഴ്ച ബീജിംഗിൽ ചൈനീസ് വിദേശകാര്യ മന്ത്രി വാങ് യിയുമായി കൂടിക്കാഴ്ച നടത്തി. ഷാങ്ഹായ് സഹകരണ സംഘടന (എസ്‌സി‌ഒ) അംഗരാജ്യങ്ങളുടെ ഉന്നത ദേശീയ സുരക്ഷാ ഉദ്യോഗസ്ഥരുടെ സമ്മേളനത്തിൽ പങ്കെടുക്കാൻ ചൈനയിൽ എത്തിയതായിരുന്നു ഡോവൽ.
പ്രാദേശിക സമാധാനത്തിനും സ്ഥിരതയ്‌ക്കും വേണ്ടി എല്ലാത്തരം ഭീകരതയെയും ചെറുക്കേണ്ടതിന്റെ ആവശ്യകതയെപ്പറ്റി അജിത് ഡോവൽ ചർച്ചയിൽ ഊന്നിപ്പറഞ്ഞു. ഇതിനു പുറമെ ഇന്ത്യ-ചൈന ബന്ധത്തിന്റെ വിവിധ വശങ്ങളും ഡോവലും വാങ്ങും ചർച്ച ചെയ്തു.
കിഴക്കൻ ലഡാക്ക് അതിർത്തിയിലെ സംഘർഷത്തെത്തുടർന്ന് ബന്ധങ്ങളിലെ പിരിമുറുക്കം ഇല്ലാതാക്കാൻ ഇരുപക്ഷവും ശ്രമങ്ങൾ നടത്തുന്നുണ്ട്. അതിർത്തിയിൽ സമാധാനം നിലനിർത്തുകയും ഭീകരതയെ ചെറുക്കുകയും ചെയ്യുക എന്നതാണ് ഈ യോഗത്തിന്റെ ലക്ഷ്യമെന്നും ഡോവൽ പറഞ്ഞു.
അതേ സമയം ഇന്ത്യ-ചൈന ഉഭയകക്ഷി ബന്ധത്തിലെ സമീപകാല സംഭവവികാസങ്ങൾ ഇരു രാജ്യങ്ങളും അവലോകനം ചെയ്തതായി ഇന്ത്യൻ വിദേശകാര്യ മന്ത്രാലയം പ്രസ്താവനയിൽ പറഞ്ഞു. പരസ്പര ബന്ധം മുന്നോട്ട് കൊണ്ടുപോകേണ്ടതിന്റെ ആവശ്യകതയെയും ഇരു നേതാക്കളും പരസ്പരം ചർച്ച ചെയ്തതായി മന്ത്രാലയം ഊന്നിപ്പറഞ്ഞു.
കൂടാതെ ഇരു രാജ്യങ്ങളും തമ്മിലുള്ള ബന്ധം ശക്തിപ്പെടുത്തുന്നതിന് ജനങ്ങൾ തമ്മിലുള്ള ബന്ധം വർദ്ധിപ്പിക്കുന്നതിനെക്കുറിച്ചും ചർച്ച നടന്നു. മേഖലയിൽ സമാധാനവും സ്ഥിരതയും നിലനിർത്തുന്നതിന് എല്ലാത്തരം ഭീകരതയെയും ചെറുക്കേണ്ടതിന്റെ ആവശ്യകതയെപ്പറ്റി ഡോവൽ ഊന്നിപ്പറഞ്ഞതായി മന്ത്രാലയത്തിന്റെ പ്രസ്താവനയിൽ പറയുന്നു.
അതേ സമയം അതിർത്തി തർക്കം പൂർണ്ണമായും പരിഹരിക്കുകയും പരസ്പര ബന്ധം പുനഃസ്ഥാപിക്കുകയും ചെയ്യുക എന്നതാണ് ഈ യോഗത്തിന്റെ ലക്ഷ്യമെന്ന് ചൈനീസ് വിദേശകാര്യ മന്ത്രാലയം പറഞ്ഞു. ഇതോടൊപ്പം, ഇരു രാജ്യങ്ങളും തമ്മിലുള്ള ബന്ധം വീണ്ടും ശക്തിപ്പെടുത്തണമെന്നും നിർദ്ദേശിച്ചു.
ഭീകരതയ്‌ക്കെതിരെ ചൈനയ്‌ക്കുള്ള ശക്തമായ സന്ദേശം
അതേ സമയം ഡോവലിന്റെ പരാമർശം ചൈനയ്‌ക്ക് പരോക്ഷമായ ഒരു സന്ദേശമായി കണക്കാക്കപ്പെടുന്നു. ചൈനയുടെ സുഹൃത്ത് രാജ്യമായ പാകിസ്ഥാനെ അവരുടെ സ്വന്തം മണ്ണിൽ നിന്ന് പ്രവർത്തിക്കുന്ന തീവ്രവാദ സംഘടനകൾക്കെതിരെ നടപടിയെടുക്കാൻ സമ്മർദ്ദം ചെലുത്തുക എന്ന സന്ദേശമാണ് ഡോവൽ തന്റെ ചർച്ചയിലൂടെ അവതരിപ്പിച്ചത്.
