ന്യൂദല്‍ഹി: സമാധാനം നിലനിര്‍ത്തുന്നതിനുള്ള ഭാരതത്തിന്റെ ശ്രമങ്ങള്‍ അന്താരാഷ്‌ട്രതലത്തില്‍ നിര്‍ണായക പങ്ക് വഹിക്കുന്നുവെന്ന് ഐക്യരാഷ്‌ട്രസഭയുടെ സമാധാന പ്രവര്‍ത്തനങ്ങളുടെ അണ്ടര്‍ സെക്രട്ടറി ജനറല്‍ ജീന്‍-പിയറി ലാക്രോയിക്‌സ്. അന്താരാഷ്ട്ര സമാധാന പരിപാലന ദിനത്തോടനുബന്ധിച്ച് നടത്തിയ മാധ്യമസമ്മേളനത്തില്‍ വച്ചാണ് ജീന്‍-പിയറി ലാക്രോയിക്‌സ് ഭാരതത്തെ പ്രശംസിച്ചത്.
സമാധാനപാലകര്‍ക്കെതിരായ കുറ്റകൃത്യങ്ങള്‍ കൈകാര്യം ചെയ്യുന്നതിനുള്ള ഭാരതത്തിന്റെ സമീപനം മറ്റുള്ളവരില്‍ നിന്ന് വളരെ വ്യത്യസ്തമാണ്. ഭാരതത്തിലെ പുരുഷന്മാരും സ്ത്രീകളും യുഎന്‍ ദൗത്യങ്ങളില്‍ ശ്രദ്ധേയമായ സംഭാവനകള്‍ നല്കിയിട്ടുണ്ട്. മാത്രമല്ല, സമാധാനപാലകര്‍ക്ക് ദോഷം സംഭവിക്കുമ്പോള്‍ നീതി ഉറപ്പാക്കുന്നതില്‍ ഭാരതം പലപ്പോഴും നേതൃപരമായ പങ്ക് വഹിച്ചിട്ടുണ്ട്. ഇത് അങ്ങേയറ്റം പ്രശംസനീയമാണെന്നും ലാക്രോയിക്‌സ് പറഞ്ഞു.
അന്താരാഷ്ട്ര സുരക്ഷയില്‍ ഭാരതത്തിന്റെ സ്വാധീനം വര്‍ദ്ധിച്ചുവരികയാണ്. ആഗോള സമാധാന പരിപാലനത്തിനായുള്ള ഭാരതത്തിന്റെ പ്രതിബദ്ധത പ്രശംസനീയമാണ്. ഇന്ന് യുഎന്‍ സമാധാന പരിപാലന ദൗത്യങ്ങളില്‍ പ്രധാന സംഭാവന നല്‍കുന്നത് ഭാരതമാണ്. സമാധാന സേനാംഗങ്ങള്‍ക്കെതിരായ കുറ്റകൃത്യങ്ങള്‍ക്കെതിരെ നടപടി ഉറപ്പാക്കുന്നതില്‍ ആഗോള നേതാവായും ഭാരതം മാറിയിരിക്കുന്നുവെന്ന് ഐക്യരാഷ്‌ട്രസഭ നേതൃത്വം അഭിപ്രായപ്പെട്ടു.
