ബംഗ്ലാദേശിൽ നിന്നും വിവാഹം കഴിക്കരുത്, വിദേശ ഭാര്യമാരുമായി ഒരു ബന്ധവും വേണ്ട : പൗരന്മാർക്ക് കർശന നിർദ്ദേശം നൽകി ചൈന 

ബീജിങ് : ചൈന തങ്ങളുടെ പൗരന്മാർക്ക് നൽകിയ ഉപദേശം ലോകമെമ്പാടും ഇപ്പോൾ ചർച്ച ചെയ്യപ്പെടുകയാണ്. ചൈനീസ് എംബസിയാണ് തങ്ങളുടെ പൗരൻമാർക്ക് വിവാഹവുമായി ബന്ധപ്പെട്ട വ്യത്യസ്ത ഉപദേശം നൽകിയിരിക്കുന്നതെന്ന് ഗ്ലോബൽ ടൈംസ് റിപ്പോർട്ട് ചെയ്തു.

ചില ചൈനീസ് പൗരന്മാർ ബംഗ്ലാദേശിൽ നിന്ന് വധുക്കളെ തേടുന്നതിനോ നിയമവിരുദ്ധ വിവാഹങ്ങൾ നടത്തുന്നതിനോ വേണ്ടി ബ്രോക്കർമാരെ ആശ്രയിക്കുന്നു. ഇത്തരമൊരു സാഹചര്യത്തിലാണ് ചൈനീസ് എംബസി ഞായറാഴ്ച രാത്രി വൈകി ഒരു ഉപദേശം പുറപ്പെടുവിച്ചത്. വിദേശ ഭാര്യയെ സ്വീകരിക്കുക എന്ന തെറ്റായ ആശയം പൂർണ്ണമായും ഉപേക്ഷിക്കാൻ ബംഗ്ലാദേശിലെ ചൈനീസ് എംബസി തങ്ങളുടെ പൗരന്മാരോട് ആവശ്യപ്പെട്ടു.

“ഒരു ചെറിയ വീഡിയോ കണ്ട് തെറ്റിദ്ധരിക്കരുത്, വിദേശ വിവാഹത്തിന്റെ പ്രലോഭനത്തിൽ നിയമം ലംഘിക്കരുത്!” – എംബസി തങ്ങളുടെ പൗരന്മാർക്ക് വ്യക്തമായി മുന്നറിയിപ്പ് നൽകിയിട്ടുണ്ട്. ബംഗ്ലാദേശിൽ വിവാഹം കഴിക്കുന്നതിന് മുമ്പ് ഗൗരവമായി ചിന്തിക്കണമെന്ന് ബംഗ്ലാദേശിലെ ചൈനീസ് എംബസി തങ്ങളുടെ പൗരന്മാരെ ഉപദേശിച്ചു. അതിർത്തി കടന്നുള്ള വിവാഹ ഏജൻസികളിൽ നിന്ന് വിട്ടുനിൽക്കാനും ഓൺലൈൻ പ്രണയ തട്ടിപ്പുകൾക്കെതിരെ ജാഗ്രത പാലിക്കാനും എംബസി പൗരന്മാരോട് നിർദ്ദേശിച്ചു. ഇത്തരമൊരു തട്ടിപ്പിന് ഇരയായാൽ ഉടൻ തന്നെ ചൈനീസ് പോലീസിനെ അറിയിക്കണമെന്ന് ഉപദേശത്തിൽ ആവശ്യപ്പെടുന്നു.

മനുഷ്യക്കടത്ത് കേസുകളിൽ ബംഗ്ലാദേശ് സർക്കാർ വളരെ കർശനമായ നിലപാടാണ് സ്വീകരിക്കുന്നതെന്ന് എംബസി അറിയിച്ചു. വ്യാജ വിവാഹത്തിലൂടെ മനുഷ്യക്കടത്തിൽ ഏർപ്പെട്ടിരിക്കുന്നതായി ആരെങ്കിലും കണ്ടെത്തിയാൽ അവർക്കെതിരെ കർശന നടപടി സ്വീകരിക്കാവുന്നതാണ്.

ബംഗ്ലാദേശിൽ മനുഷ്യക്കടത്ത് കുറ്റങ്ങൾക്ക് കുറഞ്ഞത് ഏഴ് വർഷം തടവോ, ജീവപര്യന്തം തടവോ, വധശിക്ഷയോ, കുറഞ്ഞത് 5,00,000 ടാക്ക (ഏകദേശം 3.5 ലക്ഷം രൂപ) പിഴയോ ലഭിക്കാം. കള്ളക്കടത്തിന് പ്രേരിപ്പിക്കുകയോ ആസൂത്രണം ചെയ്യുകയോ സഹായിക്കുകയോ ചെയ്യുന്നവർക്ക് മൂന്ന് മുതൽ ഏഴ് വർഷം വരെ തടവും 20,000 ടാക്ക വരെ പിഴയും ലഭിക്കും. ബംഗ്ലാദേശിലെ നീതിന്യായ നടപടികൾ പലപ്പോഴും ദൈർഘ്യമേറിയതാണെന്നും എംബസി പറഞ്ഞു. ഒരാളുടെ അറസ്റ്റ് മുതൽ ശിക്ഷ വിധിക്കുന്നതുവരെ മാസങ്ങളോ വർഷങ്ങളോ എടുത്തേക്കാം.

അതേ സമയം ബംഗ്ലാദേശിൽ സ്ഥിതി മെച്ചമല്ല. ഒരു വശത്ത് ഇടക്കാല സർക്കാരിന്റെ തലവൻ മുഹമ്മദ് യൂനുസ് പ്രശ്‌നങ്ങളാൽ വലയുകയാണ്. മറുവശത്ത് തൊഴിലില്ലായ്‌മയും സാമ്പത്തിക പ്രതിസന്ധിയും അതിന്റെ ഉച്ചസ്ഥായിയിലെത്തിയിരിക്കുന്നു. ഇത്തരമൊരു സമയത്ത് ആണ് ചൈന തങ്ങളുടെ പൗരൻമാർക്ക് കല്യാണവുമായി ബന്ധപ്പെട്ട് നിർദ്ദേശങ്ങൾ നൽകിയിരിക്കുന്നത്.