വാഷിംഗ്ടണ്‍: ഗാസ യുദ്ധകാലത്ത് ഇസ്രായേൽ സൈന്യത്തിന് ആർട്ടിഫിഷ്യൽ ഇന്റലിജൻസ് (എഐ), ക്ലൗഡ് കമ്പ്യൂട്ടിംഗ് സേവനങ്ങൾ നൽകിയതായി ടെക്‌നോളജി ഭീമനായ മൈക്രോസോഫ്റ്റ് അവകാശപ്പെട്ടു. ഹമാസിനെ തകർക്കാൻ ഇസ്രായേൽ സൈന്യം ഈ സേവനങ്ങൾ ഉപയോഗിച്ചുവെന്ന് കമ്പനി അധികൃതർ അറിയിച്ചു.
തിരച്ചിൽ പ്രവർത്തനങ്ങളിലും ബന്ദികളെ കണ്ടെത്തുന്നതിനും രക്ഷപ്പെടുത്തുന്നതിനുമുള്ള ശ്രമങ്ങളിലാണ് ഇത് കൂടുതലും ഉപയോഗിച്ചിരുന്നതെന്നും കമ്പനി പറഞ്ഞു. എന്നാൽ ഗാസയിലെ ആളുകളെ ലക്ഷ്യം വയ്‌ക്കുന്നതിനോ ഉപദ്രവിക്കുന്നതിനോ തങ്ങളുടെ Azure പ്ലാറ്റ്‌ഫോമും എഐ സാങ്കേതികവിദ്യകളും ഉപയോഗിച്ചതിന് തെളിവുകളൊന്നും കണ്ടെത്തിയിട്ടില്ലെന്ന് കമ്പനി പറയുന്നു.
മൈക്രോസോഫ്റ്റിന്റെ കോർപ്പറേറ്റ് വെബ്‌സൈറ്റിലെ ഒരു ബ്ലോഗ് പോസ്റ്റിലൂടെയാണ് ഇക്കാര്യം അറിയിച്ചത്. യുദ്ധത്തിൽ കമ്പനിയുടെ പങ്കാളിത്തത്തിന്റെ ആദ്യ പൊതു സ്ഥിരീകരണമാണിതെന്ന് വിശ്വസിക്കപ്പെടുന്നു. ഇസ്രായേൽ പ്രതിരോധ മന്ത്രാലയവുമായി മൈക്രോസോഫ്റ്റിന് അടുത്ത പങ്കാളിത്തമുണ്ടെന്നും യുദ്ധം ആരംഭിച്ചതിനുശേഷം സൈന്യത്തിന്റെ വാണിജ്യ എഐ ഉൽപ്പന്നങ്ങളുടെ ഉപയോഗം 200 മടങ്ങ് വർദ്ധിച്ചുവെന്നും അസോസിയേറ്റഡ് പ്രസ് നേരത്തെ റിപ്പോർട്ട് ചെയ്തിരുന്നു.
ഇസ്രായേലിന് അസൂർ ക്ലൗഡ് സ്റ്റോറേജ്, പ്രൊഫഷണൽ സേവനങ്ങൾ, ഭാഷാ വിവർത്തനം, സൈബർ സുരക്ഷാ സേവനങ്ങൾ എന്നിവ നൽകിയതായി കമ്പനി അറിയിച്ചു. കൂടാതെ, ബന്ദികളെ രക്ഷിക്കാനുള്ള ശ്രമങ്ങളിൽ വാണിജ്യ കരാറുകൾക്ക് പുറമെ പ്രത്യേക അടിയന്തര സാങ്കേതിക സഹായവും സേവനങ്ങളും ഇത് നൽകി. ഈ പ്രക്രിയയിൽ തങ്ങളുടെ തത്വങ്ങൾ പാലിച്ചതായും ഗാസയിലെ പൗരന്മാരുടെ സ്വകാര്യതയെയും അവകാശങ്ങളെയും മാനിച്ചതായും മൈക്രോസോഫ്റ്റ് പറയുന്നു.
2023 ഒക്ടോബർ 7 ന് ഹമാസ് ഇസ്രായേലിനെ ആക്രമിച്ച് ഏകദേശം 1,200 പേരെ കൊന്നതിന് ശേഷമാണ് ഈ യുദ്ധം ആരംഭിച്ചത്.
