തിരുവനന്തപുരം: കെപിസിസിയുടെ പുതിയ നേതൃത്വം ചുമതലയേറ്റു. പ്രവര്‍ത്തകരുടെയും നേതാക്കളുടെയും സാന്നിധ്യത്തിലായിരുന്നു പുതിയ നേതൃത്വം സ്ഥാനമേറ്റത്.
പിണറായി സര്‍ക്കാരിന്റെ ദുര്‍ഭരണം അവസാനിപ്പിക്കുമെന്ന് പറഞ്ഞ പുതിയ കെപിസിസി പ്രസിഡന്റ് സണ്ണി ജോസഫ് പാര്‍ട്ടിയെ ഒറ്റക്കെട്ടായി നയിക്കുമെന്നും പറഞ്ഞു.
രാവിലെ മുതല്‍ ഇന്ദിരാഭവനില്‍ പ്രവര്‍ത്തകരും നേതാക്കളും കൂട്ടത്തോടെ എത്തി.സ്ഥാനമൊഴിയുന്ന അധ്യക്ഷനില്‍ നിന്ന് പുതിയ കെപിസിസി പ്രസിഡന്റ് സണ്ണി ജോസഫ് ചുമതലയേറ്റു. ഒപ്പം യുഡിഎഫ് കണ്‍വീനര്‍ അടൂര്‍ പ്രകാശും വര്‍ക്കിംഗ് പ്രസിഡന്റുമാരായ പിസി വിഷ്ണുനാഥും ഷാഫി പറമ്പിലും എ പി അനില്‍കുമാറും എത്തി.
എഐസിസി ജനറല്‍ സെക്രട്ടറി കെസി വേണുഗോപാല്‍, പ്രതിപക്ഷ നേതാവ് വിഡി സതീശന്‍, മുന്‍ പ്രതിപക്ഷ നേതാവ് രമേശ് ചെന്നിത്തല തുടങ്ങിയവരും പ്രസംഗിച്ചു. ചുമതലയേല്‍ക്കും മുമ്പ് പുതിയ നേതൃത്വം പ്രവര്‍ത്തക സമിതി അംഗം എകെ ആന്റണിയെ വീട്ടില്‍ സന്ദര്‍ശിച്ചു.
