ക്വെറ്റ: പാകിസ്താനിലെ ബലൂചിസ്താനില്‍ വീണ്ടും ഭീകരാക്രമണം.പാകിസ്ഥാന്റെ തെക്ക് പടിഞ്ഞാറൻ ഭാഗത്ത് സുരക്ഷാ ഉദ്യോഗസ്ഥർ സഞ്ചരിച്ച വാഹനത്തിന് സമീപം റോഡരികിലെ ശക്തമായ ബോംബ് പൊട്ടിത്തെറിച്ച് നാല് പാകിസ്ഥാൻ സൈനികർ കൊല്ലപ്പെടുകയും മൂന്ന് പേർക്ക് ഗുരുതരമായി പരിക്കേൽക്കുകയും ചെയ്തു.
ബലൂചിസ്ഥാൻ പ്രവിശ്യയുടെ തലസ്ഥാനമായ ക്വറ്റയിലാണ് ആക്രമണം നടന്നതെന്ന് പ്രാദേശിക പോലീസ് മേധാവി നവീദ് അഹമ്മദ് പറഞ്ഞു. ആക്രമണത്തിന്റെ ഉത്തരവാദിത്തം ഒരു ഗ്രൂപ്പും ഏറ്റെടുത്തിട്ടില്ലെങ്കിലും, പ്രവിശ്യയിലെ സുരക്ഷാ സേനയെ പതിവായി ലക്ഷ്യമിടുന്ന വംശീയ ബലൂച് വിഘടനവാദികളാണെന്ന് സംശയം ഉണ്ട്.
നേരത്തെ, പാകിസ്ഥാനിലെ ബലൂചിസ്ഥാൻ പ്രവിശ്യയിൽ പോളിയോ വാക്സിനേഷൻ ടീമിന് കാവൽ നിൽക്കുന്ന രണ്ട് സുരക്ഷാ ഉദ്യോഗസ്ഥരെ ബുധനാഴ്ച അജ്ഞാതരായ തോക്കുധാരികൾ വെടിവെച്ച് കൊന്നതായി പോലീസ് അറിയിച്ചു.മസ്‌തുങ് ജില്ലയിലെ തീരി മേഖലയിലാണ് സംഭവം, പോളിയോ വാക്സിനേഷൻ സംഘത്തെ സംരക്ഷിക്കുന്ന ലെവീസ് ഉദ്യോഗസ്ഥരെ മുഖംമൂടി ധരിച്ച തോക്കുധാരികൾ ആക്രമിച്ചതായി അസിസ്റ്റൻ്റ് കമ്മീഷണർ അക്രം ഹാരിഫൽ മാധ്യമങ്ങളോട് പറഞ്ഞു. ആക്രമണത്തിന്റെ ഉത്തരവാദിത്തം ഒരു ഗ്രൂപ്പും ഉടൻ ഏറ്റെടുത്തിട്ടില്ല.
