ആലപ്പുഴ: ‘എല്ലാത്തിലും ഒന്നാമതാണെന്നാണ് നമ്മള് പറഞ്ഞു നടക്കുന്നത്. ആദ്യം ഈ സ്വയം പുകഴ്ത്തല് നിര്ത്തണം. എല്ലാത്തിലും ഒന്നാമതായ നമ്മള് ലഹരിയിലും ഒന്നാമതാണ്.’- സ്വന്തം പാര്ട്ടി ഭരിക്കുന്ന സര്ക്കാരിന്റെ പൊങ്ങച്ചം വലിച്ചുകീറി ജി. സുധാകരന് . ആലപ്പുഴയില് ലോകാരോഗ്യ ദിനത്തോടനുബന്ധിച്ച് റെഡ്ക്രോസ് സൊസൈറ്റിയും ഹെല്ത്ത് ഫോര് ഓള് ഫൗണ്ടേഷനും നടത്തിയ ജില്ലാതല സെമിനാര് ഉദ്ഘാടനം ചെയ്യുകയായിരുന്നു അദ്ദേഹം.
‘ഇവിടത്തെ സ്ഥിതി എന്താണ്? പരീക്ഷകളെ സംബന്ധിച്ച് വ്യക്തതയില്ല, ഉത്തരക്കടലാസുകള് കാണാതെ പോകുന്നു. എംബിഎ ഉത്തരക്കടലാസുകള് സ്കൂട്ടറിലാണ് കൊണ്ടുപോകുന്നത്. കൃത്യവിലോപം തെളിഞ്ഞിട്ടും അധ്യാപകര്ക്കെതിരെ നടപടിയില്ല. ഒരു വിദ്യാര്ത്ഥി സംഘടനയും ഇതിനെതിരെ മിണ്ടുന്നില്ല. പരീക്ഷയ്ക്കൊന്നും ഒരു വ്യവസ്ഥയുമില്ലാത്ത സ്ഥിതിയിലാണ് കാര്യങ്ങള്’- സുധാകരന് പറഞ്ഞു.
