കോഴിക്കോട്: ലോകസാഹിത്യത്തിനൊപ്പം സഞ്ചരിച്ച് കേരള സാഹിത്യത്തെ, കേരളത്തനിമ ഉയര്‍ത്തിപ്പിടിച്ച് മലയാളികളില്‍ സ്വാധീനം ചെലുത്തിയ എഴുത്തുകാരനായിരുന്നു എം.ടി വാസുദേവന്‍ നായരെന്ന് കേന്ദ്രസഹമന്ത്രി ജോര്‍ജ്ജ് കുര്യന്‍. അന്തരിച്ച സാഹിത്യകാരന്‍ എം.ടി വാസുദേവന്‍ നായരുടെ കൊട്ടാരം റോഡിലെ വീട്ടിലെത്തിയ ശേഷം മാധ്യമങ്ങളോട് സംസാരിക്കുകയായിരുന്നു മന്ത്രി.
വൈക്കം മുഹമ്മദ് ബഷീറിന്റെയും എസ്.കെ. പൊറ്റെക്കാടിന്റെയും പാതയിലൂടെ കടന്നു വന്ന് വ്യത്യസ്തമായ രീതിയില്‍ കഥ പറഞ്ഞ എം.ടി. കേരളീയരെ മാറ്റിചിന്തിപ്പിച്ചതായും ജോര്‍ജ്ജ് കുര്യന്‍ പറഞ്ഞു. എഴുത്തുകാരന്റെ ചിന്തകള്‍ സമൂഹത്തെ സ്വാധീനിക്കുമ്പോഴാണ് അത് മഹത്തരമാകുന്നത്. എം.ടിക്ക് സാമൂഹിക മനസിനെ സ്വാധീനിക്കാന്‍ സാധിച്ചു.
സിനിമയില്‍ പാടിപ്പുകഴ്‌ത്തപ്പെടുന്ന നായകന്‍മാര്‍ക്ക് പകരം വില്ലന്‍മാരെ നായക കഥാപാത്രമാക്കിയ കഥാകൃത്തായിരുന്നു എം.ടി. വില്ലന്‍മാരുടെ മാനസികാവസ്ഥ രൂപപ്പെടുന്നതെങ്ങനെയെന്ന് സിനിമയിലൂടെ കാട്ടിത്തന്നു. എഴുത്തിലുടെയും സിനിമയിലൂടെയും മലയാളി മനസിനെ സ്വാധീനിക്കാന്‍ എം.ടിക്ക് സാധിച്ചു- ജോര്‍ജ്ജ് കുര്യന്‍ പറഞ്ഞു.
‘സിതാര’യില്‍ എത്തിയ കേന്ദ്രമന്ത്രിയെ എം.ടിയുടെ ഭാര്യ കലാമണ്ഡലം സരസ്വതിയും മകള്‍ അശ്വതി വി. നായരും സ്വീകരിച്ചു. ബിജെപി ജില്ലാ പ്രസിഡന്റ് അഡ്വ.വി.കെ.സജീവന്‍, വൈസ് പ്രസിഡന്റ് അഡ്വ.കെ.വി.സുധീര്‍, നോര്‍ത്ത് മണ്ഡലം ജനറല്‍ സെക്രട്ടറി പ്രവീണ്‍ തളിയില്‍, വൈസ് പ്രസിഡന്റ് എം.ജഗന്നാഥന്‍ എന്നിവര്‍ മന്ത്രിക്കൊപ്പമുണ്ടായിരുന്നു.
