കോഴിക്കോട്: മുനമ്പം തര്‍ക്ക ഭൂമിയുടെ യഥാര്‍ത്ഥ ഉടമകളെ കണ്ടെത്തണമെന്ന് വഖഫ് ട്രൈബ്യൂണല്‍. സേഠ് കുടുംബത്തിന് പാട്ടമായാണോ തിരുവിതാംകൂര്‍ രാജാവ് ഭൂമി നല്‍കിയതെന്ന് ആരാഞ്ഞ വഖഫ് ടൈബ്ര്യൂണല്‍ പാട്ട കരാറാണെങ്കില്‍ വഖഫ് ആധാരം നിലനില്‍ക്കില്ലെന്നും പറഞ്ഞു.
വടക്കന്‍ പറവൂര്‍ സബ് കോടതി മുതല്‍ ഹൈക്കോടതിയില്‍ വരെ പതിറ്റാണ്ടുകളായി തുടരുന്ന ഭൂ പ്രശ്‌നം സംബന്ധിച്ചാണ് ട്രൈബ്യൂണല്‍ നിരീക്ഷണം. ഭൂമി വഖഫ് നല്‍കിയ 1952 മുതലുള്ള ഭൂരേഖകളാണ് കോടതികള്‍ പരിഗണിച്ചിരുന്നത്. എന്നാല്‍ 1902ല്‍ സേഠ് കുടുംബത്തിന് തിരുവിതാംകൂര്‍ രാജാവ് ഭൂമി കൈമാറിയത് പാട്ടകരാര്‍ പ്രകാരമാണെങ്കില്‍ വഖഫ് രജിസ്‌ട്രേഷന്‍ നിലനില്‍ക്കുമോയെന്നാണ് ട്രൈബ്യൂണല്‍ ഇന്ന് ചോദിച്ചത്.
1902ലെ കൈമാറ്റം പാട്ട കരാര്‍ ആണോ ഇഷ്ടദാനമാണോയെന്നത് കേസില്‍ പ്രധാനം ആണെന്ന് കോടതി നിരീക്ഷിച്ചു. വിവിധ കക്ഷികളോട് ഇത് തെളിയിക്കുന്ന രേഖകള്‍ ഹാജാരാക്കാനും ആവശ്യപ്പെട്ടു. മുനമ്പം വിഷയം സമൂഹത്തില്‍ വിവാദ ചര്‍ച്ചകള്‍ക്ക് വഴിവെച്ചതിനാല്‍ മുഴുവന്‍ രേഖകളും പരിശോധിക്കണമെന്ന് കോടതി പറഞ്ഞു.
അതേസമയം, ഭൂമി വഖഫ് തന്നെയെന്നും എല്ലാ രേഖകളും കൈവശമുണ്ടെന്നും സേഠ് കുടുംബം കോടതിയെ അറിയിച്ചു. സേഠ് കുടുംബം ഭൂമി ഇഷ്ടദാനം നല്‍കിയതാണെന്ന് ഫറൂഖ് കോളേജ് ആവര്‍ത്തിച്ചു. ഭൂമിയില്‍ നേരിട്ട് ഉടമസ്ഥത ഇല്ലാത്ത വഖഫ് സംരക്ഷണ സമിതി കേസില്‍ കക്ഷി ചേരുന്നതിനെയും ഫറൂഖ് കോളേജ് എതിര്‍ത്തു. കേസ് അടുത്ത 25ന് വീണ്ടും പരിഗണിക്കും.
