തൃശൂര്‍:പൂരം സുഗമമായി നടത്താന്‍ നിയമനിര്‍മ്മാണം ആവശ്യപ്പെട്ട് തൃശൂരിലെ ആചാര സംരക്ഷണ കൂട്ടായ്മ.സംസ്ഥാന സര്‍ക്കാര്‍ നിയമനിര്‍മ്മാണം നടത്തണമെന്നാണ് പ്രമേയത്തിലൂടെ ആവശ്യമുന്നയിച്ചത്.
ആന, വെടിക്കെട്ട് തുടങ്ങിയവയ്‌ക്ക് ഹൈക്കോടതി കര്‍ശന നിയന്ത്രണം ഏര്‍പ്പെടുത്തിയതില്‍ പ്രതിഷേധം അറിയിക്കുന്നതിനായി തിരുവമ്പാടി, പാറമേക്കാവ് ദേവസ്വങ്ങളുടെ നേതൃത്വത്തില്‍ തൃശൂരിലെ ക്ഷേത്ര ഉത്സവ കൂട്ടായ്‌മയാണ് ആചാര സംരക്ഷണ സംഗമം സംഘടിപ്പിച്ചത്.
ആന എഴുന്നള്ളിപ്പിലെ ഹൈക്കോടതിയുടെ കര്‍ശന നിയന്ത്രണങ്ങള്‍, വെടിക്കെട്ടിനുള്ള പെസോയുടെ മൂക്കുകയര്‍ എന്നിവ തുടര്‍ന്നാല്‍ കേരളത്തിലെ പൂരങ്ങളും ഉത്സവങ്ങളും പെരുനാളുകളും ഇല്ലാതാവും. അതിനാല്‍ നിയമനിര്‍മാണം നടത്താന്‍ സര്‍ക്കാര്‍ തയാറാകണമെന്നാണ് തൃശൂരിലെ ആചാര സംരക്ഷണ കൂട്ടായ്മ സര്‍ക്കാരിനോട് ആവശ്യപ്പെടുന്നത്. ജെല്ലിക്കെട്ട് മാതൃകയില്‍ കേരളവും നിയമ നിര്‍മാണം നടത്തണമെന്നാണ് ആവശ്യം.
ആന എഴുന്നള്ളത്തില്‍ കോടതി ഇടപെട്ടതില്‍ രൂക്ഷ വിമര്‍ശനമാണ് കൂട്ടായ്‌മയില്‍ ഉയര്‍ന്നത്. തൃശൂര്‍ മേയര്‍ എം.കെ. വര്‍ഗീസ് അധ്യക്ഷനായ കൂട്ടായ്മ തൃശൂര്‍ എംഎല്‍എ പി. ബാലചന്ദ്രന്‍ ഉദ്ഘാടനം ചെയ്തു. വിവിധ രാഷ്‌ട്രീയ മത, സാമുദായിക, സാംസ്‌കാരിക നേതാക്കള്‍ ഐക്യ ദാര്‍ഢ്യം പ്രകടിപ്പിച്ചെത്തി. പൂരപ്രേമി സംഘത്തിന്റെ നേതൃത്വത്തില്‍ ചൊവ്വാഴ്ച കോര്‍പ്പറേഷന്‍ ഓഫീസിന് മുന്നില്‍ ഏകദിന ഉപവാസം സംഘടിപ്പിക്കും.
