പത്തനംതിട്ട: സിപിഎം നേതാവ് പി. പി. ദിവ്യയുടെ മാനസിക പീഡനത്തെ തുടർന്ന് ആത്മഹത്യ ചെയ്ത എഡിഎം നവീൻ ബാബുവിന്റെ വസതി ബിജെപി സംസ്ഥാന അധ്യക്ഷൻ കെ.സുരേന്ദ്രൻ സന്ദർശിച്ചു. മുഖ്യമന്ത്രി പിണറായി വിജയനും സിപിഎം നേതൃത്വവും ചരിത്രത്തിൽ ഇന്നു വരെ കാണാത്ത ചതിയാണ് നവീൻ ബാബുവിന്റെ കുടുംബത്തോട് ചെയ്തതെന്ന് സന്ദർശനത്തിന് ശേഷം സുരേന്ദ്രൻ പറഞ്ഞു.
ആദ്യം മുതൽ തന്നെ മുഖ്യമന്ത്രി പിണറായി വിജയനും സിപി എം സംസ്ഥാന സെക്രട്ടറി എം.വി ഗോവിന്ദനും കണ്ണൂരിലെ പാർട്ടി ഘടകവും കൊലയാളികൾക്ക് ഒപ്പം തന്നെയായിരുന്നു. പി പി ദിവ്യയെയും കളക്ടറെയും സംരക്ഷിക്കുന്ന തരത്തിൽ, എല്ലാ തെളിവുകളും നശിപ്പിക്കാനാവശ്യമായ അന്വേഷണമാണ് പ്രത്യേക അന്വേഷണ സംഘം നടത്തിയത്. കേരളത്തിന്റെ പൊതുസമൂഹത്തിന് മുന്നിൽ തങ്ങൾ നവീൻ ബാബുവിന്റെ കുടുംബത്തോടൊപ്പമാണെന്ന് വരുത്തി തീർക്കാനുള്ള നാടകമാണ് സിപിഎം നടത്തിക്കൊണ്ടിരിക്കുന്നത്.
അവസാനത്തെ ആശ്രയമെന്ന നിലയിലാണ് നവീൻ ബാബുവിന്റെ കുടുംബം ഹൈക്കോടതിയെ സമീപിച്ചത്. സിപിഎമ്മും സർക്കാരും നടത്തിയ കള്ളക്കളികൾ നവീൻ ബാബുവിന്റെ കുടുംബത്തിന് മനസിലായ സാഹചര്യത്തിലാണ് സന്ദർശനമെന്നും സുരേന്ദ്രൻ പറഞ്ഞു.
