ആലപ്പുഴ: സംസ്ഥാന സ്കൂള് ശാസ്ത്രോത്സവത്തിനുള്ള ഒരുക്കങ്ങള് ആലപ്പുഴയില് പൂര്ത്തിയാകുന്നു. ഈ മാസം 15 മുതല് 18 വരെ ആലപ്പുഴ നഗരത്തിലെ വിവിധ സ്കൂളുകളിലാണ് ശാസ്ത്രമേള നടക്കുന്നത്. 15ന് വൈകിട്ട് നാലിന് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. 180 ഇനങ്ങളിലാണ് മത്സരം. അയ്യായിരത്തോളം കുട്ടികള് മാറ്റുരയ്ക്കും. ഇതോടനുബന്ധിച്ച് ശാസ്ത്രസംവാദം, വൊക്കേഷണല് എക്സ്പോ, കരിയര് എക്സ്പോ, കരിയര് സെമിനാര്, കല- സാംസ്കാരിക പരിപാടികള് എന്നിവയുമുണ്ട്.
15നു രാവിലെ ഒന്പതിന് പൊതു വിദ്യാഭ്യാസ ഡയറക്ടര് കെ. ജീവന്ബാബു പതാക ഉയര്ത്തും. 10ന് പ്രധാനവേദിയായ സെന്റ് ജോസഫ്സ് സ്കൂളില് രജിസ്ട്രേഷന് തുടങ്ങും. മത്സരങ്ങളുടെ മൂല്യനിര്ണയത്തിനുശേഷം പൊതുജനങ്ങള്ക്ക് കാണാം. കലാപരിപാടികള്, സാംസ്കാരിക പരിപാടികള്, നാടന്പാട്ട്, വരയരങ്ങ്, ശാസ്ത്രമേഖലയിലെ പ്രമുഖരുമായുള്ള സംവാദം തുടങ്ങിയവ ഒരുക്കിയിട്ടുണ്ട്. ശാസ്ത്രസംവാദത്തില് 16ന് രാവിലെ പത്തിന് ഐഎസ്ആര്ഒ ചെയര്മാന് എസ്. സോമനാഥ്, വൈകിട്ട് മൂന്നിന് മിസൈല് പദ്ധതികള്ക്ക് നേതൃത്വം നല്കിയ ശാസ്ത്രജ്ഞ ടെസി തോമസ്, 17ന് രാവിലെ പത്തിന് ഗഗന്യാന് പ്രോജക്ട് ഡയറക്ടര് ഡോ. എം. മോഹനന്, ഉച്ചയ്ക്ക് രണ്ടിന് ടെക്ജെന്ഷ്യ സിഇഒ ജോയ് സെബാസ്റ്റ്യന് തുടങ്ങിയവര് പങ്കെടുക്കും. വൊക്കേഷണല് എക്സ്പോയ്ക്ക് 95 സ്റ്റാളുകളും കരിയര് എക്സ്പോയ്ക്ക് 10 സ്റ്റാളുകളുമുണ്ടാകും. ലജ്നത്ത് സ്കൂളിലാണ് ഭക്ഷണശാല.
വേദികള്: ശാസ്ത്രമേള- ലിയോ തേട്ടീന്ത് സ്കൂള്, ഗണിതശാസ്ത്രമേള- ലജ്നത്തുല് മുഹമ്മദീയ എച്ച്എസ്എസ്, സാമൂഹികശാസ്ത്രമേള- സെന്റ് ജോസഫ്സ് സ്കൂള്, ഐടി മേള- സെന്റ് ജോസഫ്സ് സ്കൂള്, പ്രവൃത്തിപരിചയമേള- എസ്ഡിവി ബോയ്സ് സ്കൂള്, ഗേള്സ് സ്കൂള്, വൊക്കേഷണല് എക്സ്പോ- ലിയോ തേര്ട്ടീന്ത് സ്കൂള്, കരിയര് സെമിനാര്- ലിയോ തേര്ട്ടീന്ത് സ്കൂള്, കരിയര് എക്സിബിഷന്- ലിയോ തേര്ട്ടീന്ത് സ്കൂള്. കലാപരിപാടികള്- ലിയോ തേര്ട്ടീന്ത് സ്കൂള്.
