പത്തനംതിട്ട: കെഎസ്ആര്‍ടിസി ബസില്‍ യാത്ര ചെയ്യവെ ശരീരത്തില്‍ സ്പര്‍ശിച്ച് ഉപദ്രവിക്കാന്‍ ശ്രമിച്ച് ജനല്‍ വഴി ചാടി കടക്കാന്‍ ശ്രമിച്ചയാളെ യുവതി പിന്നാലെയോടി പിടികൂടി. വ്യാഴാഴ്ച വൈകിട്ട് ഏഴോടെയാണ് സംഭവം.
അടൂരില്‍നിന്ന് കൊട്ടാരക്കരയിലേക്കുള്ള കെഎസ്ആര്‍ടിസി ബസില്‍, അടൂരിനും പുതുശേരിക്കും ഇടയില്‍ വച്ചാണ് സംഭവം.
നാട്ടുകാര്‍ വിവരമറിയച്ചതിനെ തുടര്‍ന്ന് ഏനാത്ത് പൊലീസ് സ്ഥലത്തെത്തി ഇയാളെ കസ്റ്റഡിയിലെടുത്തു. കൊല്ലം കരിക്കോട് സ്വദേശി ഷനീറാ(42)ണ് പിടിയിലായത്. എന്നാല്‍ യുവതി പരാതി നല്‍കിയില്ല. സ്ത്രീകളെ ശല്യം ചെയ്തതിന് യുവാവിനെതിരെ പൊലീസ് കേസെടുത്തു.
യാത്രയ്‌ക്കിടെ യുവാവ് ശരീരത്തില്‍ സ്പര്‍ശിച്ചതോടെ യുവതി ശക്തമായി പ്രതികരിച്ചു. യുവാവ് ഇറങ്ങിയോടാന്‍ ശ്രമിച്ചപ്പോള്‍ കണ്ടക്ടര്‍ രണ്ടു വാതിലുകളും അടച്ചതോടെ ഇയാള്‍ കുടുങ്ങി. ബസ് പുതുശേരിഭാഗം പെട്രോള്‍ പമ്പിനു സമീപത്തെ ബസ് കാത്തിരിപ്പ് കേന്ദ്രത്തില്‍ നിര്‍ത്തിയപ്പോള്‍ ഇയാള്‍ ഗ്ലാസ് ചില്ലുകളിലൊന്ന് നീക്കി പുറത്തേക്കു ചാടി ഓടാന്‍ ശ്രമിച്ചു.
ഇതോടെ യുവതി ബസില്‍ നിന്നിറങ്ങി ഇയാളുടെ പിന്നാലെ ഓടി. പിടികൂടിയപ്പോഴേക്കും നാട്ടുകാരും എത്തി. ഇയാള്‍ മദ്യ ലഹരിയിലായിരുന്നു.കൊല്ലം തലച്ചിറ സ്വദേശിനി യുവതിക്കൊപ്പം ബന്ധുവായ മറ്റൊരു യുവതിയും ഉണ്ടായിരുന്നു. ഇവര്‍ പിന്നീട് ഇതേ ബസില്‍ യാത്ര തുടര്‍ന്നു.
പ്രതികരിക്കാൻ ഇവിടെ എഴുതുക: