ശ്രീനഗർ: ജമ്മുകശ്മീരിൽ ഞായറാഴ്ച തിരക്കേറിയ മാർക്കറ്റിൽ ഭീകരർ നടത്തിയ ഗ്രനേഡ് ആക്രമണത്തിൽ 11 പേർക്ക് പരിക്കേറ്റതായി അധികൃതർ അറിയിച്ചു. ടൂറിസ്റ്റ് റിസപ്ഷൻ സെൻ്ററിന് സമീപമുള്ള ആകാശവാണിയുടെയും ദൂരദർശൻ കേന്ദ്രത്തിന്റെയും കനത്ത സുരക്ഷയുള്ള സമുച്ചയത്തിന് സമീപമാണ് ആക്രമണം നടന്നത്.
ലഷ്കർ-ഇ-തൊയ്ബയുടെ (എൽഇടി) ഒരു ഉന്നത പാകിസ്ഥാൻ കമാൻഡറെ ശ്രീനഗർ ഖൻയാർ പ്രദേശത്ത് സുരക്ഷാ സേന വധിച്ചതിന് തൊട്ടുപിന്നാലെയാണ് ആക്രമണം നടന്നത്. അതേ സമയം സംഭവം നടന്ന ഉടൻ പരിക്കേറ്റവരെ പുറത്തെടുക്കാൻ പോലീസും അർദ്ധസൈനിക വിഭാഗവും സ്ഥലത്തെത്തിയിരുന്നു.
കൂടാതെ ഭീകരരെ കണ്ടെത്തുന്നതിനായി തിരച്ചിൽ ആരംഭിച്ചതായും ഉദ്യോഗസ്ഥർ അറിയിച്ചു. അതേ സമയം ശനിയാഴ്ച ലഷ്കർ കമാൻഡർ കൊല്ലപ്പെട്ടതിനെ തുടർന്നുള്ള ഭീകരരുടെ നിരാശയിൽ നിന്നാണ് ആക്രമണം ഉണ്ടായതെന്ന് ഉദ്യോഗസ്ഥൻ പറഞ്ഞു. ആക്രമണത്തെ മുഖ്യമന്ത്രി ഒമർ അബ്ദുള്ള അപലപിച്ചു.
