തിരുവനന്തപുരം: മുതലപ്പൊഴിയില്‍ വീണ്ടും അപകടം. കൂറ്റന്‍ തിരമാലകളില്‍ കൂറ്റന്‍ ബാര്‍ജ് പുലിമുട്ടിലേക്ക് ഇടിച്ചു കയറി.അഴിമുഖത്ത് കുടുങ്ങിക്കിടക്കുകയാണ് ബാര്‍ജ്. ശനിയാഴ്ച രാവിലെ പത്തരയോടെയാണ് അപകടം.
വിഴിഞ്ഞത്തേക്ക് പുറപ്പെട്ട കൂറ്റന്‍ ബാര്‍ജ് അഴിമുഖത്തുണ്ടായ ശക്തമായ തിരയില്‍പ്പെടുകയായിരുന്നു. ബാര്‍ജിലുണ്ടായിരുന്ന അഞ്ചുജീവനക്കാരെ വടം കെട്ടി് പുറത്തെത്തിക്കുകയായിരുന്നു.അപകടത്തില്‍ രണ്ട് ജീവനക്കാര്‍ക്ക് പരിക്കേറ്റു. ഇവരെ ചിറയിന്‍കീഴ് താലൂക്ക് ആശുപത്രിയില്‍ പ്രവേശിപ്പിച്ചു.
അഴിമുഖത്ത് നിന്നും നീക്കുന്ന മണല്‍ പുറംകടലില്‍ നിക്ഷേപിക്കാനാണ് മാസങ്ങള്‍ക്ക് മുമ്പ് ബാര്‍ജ് അദാനി ഗ്രൂപ്പ് മുതലപ്പൊഴിയില്‍ എത്തിച്ചത്. കാലാവസ്ഥ പ്രതികൂലമായതിനാല്‍ മണല്‍ നീക്കം നിലച്ചു.ഇതോടെയാണ് ബാര്‍ജ് വിഴിഞ്ഞത്തേക്ക് പുറപ്പെട്ടത്.
ബാര്‍ജിനെ വേലിയേറ്റ സമയത്ത് കടലിലേക്ക് നീക്കാന്‍ സാധിക്കുമെന്നാണ് അധികൃതരുടെ പ്രതീക്ഷ.
