ബിലാസ്പൂർ: ഹരിയാനയ്ക്ക് പിന്നാലെ മഹാരാഷ്ട്രയിലും ജാർഖണ്ഡിലും വരാനിരിക്കുന്ന നിയമസഭാ തെരഞ്ഞെടുപ്പുകളിൽ ബിജെപി തൂത്തുവാരുമെന്ന് പാർട്ടി അധ്യക്ഷൻ ജെ. പി നദ്ദ. ഛത്തീസ്ഗഢിലെ ശ്രീ നൈനാ ദേവി ക്ഷേത്രത്തിൽ ദർശനം നടത്തിയ ശേഷം മാധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം.
നിയമസഭ തെരഞ്ഞെടുപ്പിൽ പാർട്ടി വിജയിച്ചതിന് ശേഷം ക്ഷേത്രത്തിൽ പ്രാർത്ഥന നടത്താൻ എത്തിയതായിരുന്നു കേന്ദ്ര ആരോഗ്യമന്ത്രി. പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്രത്തിലെ ബിജെപി സർക്കാരിന്റെ പ്രകടനത്തിൽ ജനങ്ങൾ സന്തുഷ്ടരാണ്.
ഹരിയാനയിലും ജമ്മു കശ്മീരിലും ബിജെപി വളരെയധികം നേട്ടങ്ങൾ കൈവരിച്ചിട്ടുണ്ടെന്നും നദ്ദ പറഞ്ഞു. ഈ വിജയത്തിന്റെ പൂർണ്ണ ക്രെഡിറ്റ് ജനങ്ങൾക്കും ദൈവത്തിനും സമർപ്പിക്കുന്നുവെന്നും അദ്ദേഹം പറഞ്ഞു.
ഹരിയാന നിയമസഭാ തെരഞ്ഞെടുപ്പിൽ ഭരണം നിലനിർത്താനും കോൺഗ്രസിന്റെ തിരിച്ചുവരവ് തടയാനും ഭരണകക്ഷിയായ ബിജെപിക്ക് ഹാട്രിക് വിജയത്തോടെ സാധിച്ചു. കൂടാതെ ജമ്മു കശ്മീരിൽ 90ൽ 29 സീറ്റും നേടിയാണ് ബിജെപി ശ്രദ്ധേയമായ നേട്ടം കൈവരിച്ചത്.
