ടെല് അവീവ്: ഹിസ്ബുള്ള ഭീകരരെ ഒഴിവാക്കണമെന്ന് ലെബനന് മുന്നറിയിപ്പുമായി ഇസ്രയേല് പ്രധാനമന്ത്രി ബെഞ്ചമിന് നെതന്യാഹു. ഗാസയുടേയതിന് സമാനമായ അവസ്ഥയാകും ലെബനനും നേരിടേണ്ടി വരിക. ഹിസ്ബുള്ള ഭീകരരുടെ പിടിയില് നിന്ന് സ്വന്തം രാജ്യത്തെ മോചിപ്പിക്കാനുള്ള ശ്രമങ്ങള് നടത്തണമെന്നും ബെഞ്ചമിന് അഭ്യര്ത്ഥിച്ചു. ലെബനന്റെ തെക്കന് മേഖലയില് ഇസ്രയേല് ആക്രമണം ശക്തമാക്കിയ സാഹചര്യത്തിലാണ് ലെബനന് ജനതയെ അഭിസംബോധന ചെയ്ത് നെതന്യാഹു വീഡിയോ സന്ദേശം പുറത്തുവിട്ടത്.
പ്രദേശത്ത് ഇസ്രയേല് കൂടുതല് സൈനികരെ വിന്യസിച്ചിട്ടുണ്ട്. ഒഴിഞ്ഞുപോകാന് സാധാരണക്കാര്ക്ക് നിര്ദേശം നല്കിയതിന് ശേഷം മാത്രമാണ് ഓരോ ഇടങ്ങളിലും സൈന്യം ആക്രമണം നടത്തുന്നത്. ഇറാനും ഹിസ്ബുള്ളയും ചേര്ന്നാണ് ലെബനനെ കുഴപ്പത്തിലാക്കിയത്. ഒരു വര്ഷത്തിനിടെ 8000 മിസൈലുകളാണ് ഇസ്രയേലിനെതിരെ ഹിസ്ബുള്ള പ്രയോഗിച്ചത്. ഇതിന് ഒരു അവസാനം കുറിക്കാന് തന്നെയാണ് ഇസ്രയേലിന്റെ തീരുമാനം. പ്രതിരോധിക്കാന് അവകാശമുണ്ടെന്നും നെതന്യാഹു പറഞ്ഞു. ലെബനനിലെ തെക്ക്-കിഴക്കന് മേഖലകള് കേന്ദ്രീകരിച്ചാണ് ഇസ്രയേല് സൈന്യം ആക്രമണം കടുപ്പിച്ചിരിക്കുന്നത്. ഹിസ്ബുള്ളയുടെ അടിസ്ഥാന സൗകര്യ കേന്ദ്രങ്ങളാണ് ഈ ഘട്ടത്തില് ലക്ഷ്യം വയ്ക്കുന്നതെന്നും ഇസ്രയേല് അറിയിച്ചിട്ടുണ്ട്. അതേസമയം ഇസ്രയേലിലെ തുറമുഖ നഗരമായ ഹൈഫയില് റോക്കറ്റ് ആക്രമണം നടത്തിയതിന്റെ ഉത്തരവാദിത്തം ഹിസ്ബുള്ള ഏറ്റെടുത്തിട്ടുണ്ട്.
ഹസന് നസ്റുള്ളയുടെ പിന്ഗാമി ആകാനിടയുള്ള ഹിസ്ബുള്ളയുടെ മുതിര്ന്ന നേതാക്കളെയെല്ലാം വകവരുത്തിയെന്ന് നെതന്യാഹു വ്യക്തമാക്കി. എന്നാല് ഇവരുടെ പേരുകള് പുറത്തുവിട്ടിട്ടില്ല.
അതേ സമയം ആക്രമണങ്ങള് സംബന്ധിച്ച വിവരങ്ങള് കൈമാറാന് ഇസ്രയേല് വിസമ്മതിച്ചതില് അമേരിക്കയ്ക്ക് അതൃപ്തി. കഴിഞ്ഞയാഴ്ച ഇറാന് നടത്തിയ മിസൈല് ആക്രമണത്തിനുള്ള പ്രതികാര പദ്ധതികളുടെ വിശദാംശങ്ങള് പങ്കിടാന് ഇസ്രയേല് വിസമ്മതിച്ചത് അമേരിക്കയെ നിരാശരാക്കിയതായി അധികൃതര് വാള്സ്ട്രീറ്റ് ജേണലിനോട് പറഞ്ഞു.
മിഡില് ഈസ്റ്റില് സമ്പൂര്ണ യുദ്ധം ഉണ്ടാകുമെന്ന ഭീതിയില് ഇറാന്റെ എണ്ണ കേന്ദ്രങ്ങളിലോ ആണവ കേന്ദ്രങ്ങളിലോ ആക്രമണം നടത്തരുതെന്ന് യുഎസ് ആവശ്യപ്പെട്ടിട്ടുണ്ടെങ്കിലും തിരിച്ചടിക്കുമെന്ന് ഇസ്രയേല് വ്യക്തമാക്കിയിരുന്നു. ഇസ്രയേല് പ്രതിരോധ മന്ത്രി യോവ് ഗാലന്റിന്റെ വാഷിങ്ടണ് സന്ദര്ശന വേളയില് ഇസ്രയേലിന്റെ പദ്ധതികളെക്കുറിച്ച് വിവരങ്ങള് ലഭിക്കുമെന്ന പ്രതീക്ഷയിലായിരുന്നു അമേരിക്ക. എന്നാല് ഗാലന്റിന്റെ യുഎസിലേക്കുള്ള യാത്ര താത്കാലികമായി നെതന്യാഹു മാറ്റിവയ്ക്കുകയായിരുന്നു.
