കൊച്ചി :നടിയെ അക്രമിച്ച കേസില്‍ സാക്ഷി വിസ്താരം പൂര്‍ത്തിയാക്കിയ ഉത്തരവ് പുനപരിശോധിക്കണമെന്നാവശ്യപ്പെട്ട് പ്രോസിക്യൂഷന്റെ ഹര്‍ജി.പ്രോസിക്യൂഷന്‍ സാക്ഷിവിസ്താരം പൂര്‍ത്തിയാക്കി ഇക്കാര്യം കോടതിയെ അറിയിച്ചിരുന്നു.
എന്നാല്‍ പ്രതിഭാഗം സാക്ഷിവിസ്താരം പൂര്‍ത്തിയാക്കിയെന്ന് രേഖാമൂലം കോടതിയെ അറിയിച്ചിട്ടില്ല. ഇക്കാര്യം പരിശോധിക്കണമെന്ന് പ്രോസിക്യൂഷന്‍ വ്യാഴാഴ്ച കോടതിയില്‍ ആവശ്യപ്പെട്ടു. ഈ നടപടി പൂര്‍ത്തിയാക്കാത്തത് പിന്നീട് വിചാരണയിലെ വീഴ്ചയായി മേല്‍കോടതികള്‍ കണക്കിലെടുക്കും. അനുബന്ധ കുറ്റപത്രം നല്‍കിയതിന് പിന്നാലെ സാക്ഷികളെ വീണ്ടും വിസ്തരിക്കാന്‍ ഇരുഭാഗത്തിനും കഴിയും.
അതേ സമയം, നടി ആക്രമിക്കപ്പെട്ട കേസില്‍ രണ്ടാംഘട്ട വിചാരണ എറണാകുളം പ്രിന്‍സിപ്പല്‍ സെഷന്‍സ് കോടതിയില്‍ ആരംഭിച്ചു. പ്രോസിക്യൂഷന്‍ ഹാജരാക്കിയ തെളിവുകളും സാക്ഷി മൊഴികളും അനുസരിച്ച് പ്രതികളോട് കോടതി ചോദ്യങ്ങള്‍ ഉന്നയിക്കുന്ന നടപടിയാണ് തുടങ്ങിയത്. നടന്‍ ദിലീപ്, പള്‍സര്‍ സുനി, മാര്‍ട്ടിന്‍ മണികണ്ഠന്‍ എന്നിവര്‍ കോടതിയില്‍ എത്തിയിരുന്നു. ആകെ പത്ത് പ്രതികളാണുള്ളത്. പ്രതികളെ കേട്ടതിന് ശേഷം അടുത്ത ഘട്ടം വിചാരണയിലേക്ക് കടക്കും.
