ആലപ്പുഴ: ബ്രാഞ്ച് സമ്മേളനങ്ങള് നടന്നുവരവെ സിപിഎമ്മില് കൂട്ടരാജിയില് വലയുകയാണ് നേതൃത്വം. പ്രാദേശിക വിഷയങ്ങള് മുതല് ലോക് സഭാ തെരഞ്ഞെടുപ്പ് പരാജയം വരെയാണ് രാജിക്ക് കാരണം.
കായംകുളം, അരൂക്കുറ്റി, ഹരിപ്പാട് എന്നിവിടങ്ങളിലായി ഇതിനകം 105 പേരാണ് രാജിക്കത്ത് നല്കിയത്. ആലപ്പുഴ, കായംകുളം ഏരിയ കമ്മിറ്റിക്ക് കീഴില് പുള്ളിക്കണക്ക് ലോക്കല് കമ്മിറ്റി പരിധിയില് ആലുംമ്മുട്, സൊസൈറ്റി ബ്രാഞ്ചുകളില് നിന്നായി ഇന്നലെ പത്ത് പേരാണ് രാജിക്കത്ത് നല്കിയത്. പുള്ളിക്കണക്ക് ലോക്കല് കമ്മിറ്റിയിലെ മാവേലി സ്റ്റോര് ബ്രാഞ്ചിലെ നാലുപേരെ ബ്രാഞ്ച് സമ്മേളനത്തിന് തൊട്ട് മുന്പ് പുറത്താക്കിയതില് പ്രതിഷേധിച്ചാണ് കൂട്ട രാജി. ഗ്രാമ സഭ നടത്തിപ്പിലെ പ്രശ്നങ്ങളാണ് കാരണം. തുടര്ന്ന് ലോക്കല് കമ്മിറ്റി അംഗം വിപിന് ദാസ്, ബ്രാഞ്ച് സെക്രട്ടറിമാരായ ഷാം, രാജേന്ദ്രന്, പാര്ട്ടി അംഗം മോഹനന് പിള്ള എന്നിവര്ക്കെതിരെ നേരത്തേ നടപടി സ്വീകരിക്കുകയായിരുന്നു.
പ്രാദേശിക വിഭാഗീയതയുടെ പശ്ചാത്തലത്തിലുളള നടപടി തെരഞ്ഞെടുപ്പ് സമയത്ത് സംസ്ഥാന സെക്രട്ടറിയേറ്റ് അംഗം സജി ചെറിയാന് ഇടപെട്ട് ഒഴിവാക്കിയിരുന്നു. എന്നാല് സമ്മേളനം പ്രഖ്യാപിച്ചതോടെ വീണ്ടും ഇവരെ പുറത്താക്കി. ഇതോടെ പുള്ളിക്കണക്ക് ലോക്കല് കമ്മിറ്റിയ്ക്ക് കീഴില് രാജി വച്ച പാര്ട്ടി അംഗങ്ങളുടെ എണ്ണം 22ആയി. ഹരിപ്പാട് കുമാരപുരത്ത് പഞ്ചായത്ത് പ്രസിഡന്റ് ഉള്പ്പടെ കഴിഞ്ഞ ദിവസം രാജിക്കത്ത് നല്കി. ലോക്സഭ തെരഞ്ഞെടുപ്പില് ഒരു വിഭാഗം ബിജെപിയ്ക്ക് വളരാന് വഴിയൊരുക്കിയെന്നാണ് രാജിക്കത്ത് നല്കിയവരുടെ ആരോപണം.മുതിര്ന്ന നേതാക്കള് ഇടപെട്ട് അനുനയത്തിന് ശ്രമിച്ചെങ്കിലും വിജയിച്ചില്ല. അമ്പലപ്പുഴയില് മുന് ബ്രാഞ്ച് സെക്രട്ടറി ഉള്പ്പടെ രാജി നല്കി.
വിഭാഗീയതയില് പഞ്ചായത്ത് ഭരണം നഷ്ടമായ കുട്ടനാട്ടില് ബ്രാഞ്ച് സമ്മേളനങ്ങള് തുടങ്ങിയപ്പോള് കരുതലോടെയാണ് ഔദ്യോഗിക പക്ഷം നീങ്ങുന്നന്ത്.
