ന്യൂദല്ഹി: പാരിസ് ഒളിംപിക്സ് ഹോക്കിയില് വെങ്കല മെഡല് നേടിയ ഇന്ത്യന് ഹോക്കി താരങ്ങള്ക്ക് രാജകീയ വരവേല്പ് നല്കി രാജ്യതലസ്ഥാനം. വിജയശില്പിയും മലയാളിയുമായ പി.ആര്. ശ്രീജേഷ് അടക്കമുള്ള താരങ്ങള് ഇന്ന് രാവിലെയാണ് ദല്ഹിയില് വിമാനമിറങ്ങിയത്. വിമാനത്താവളത്തില് പ്രിയതാരങ്ങളെ സ്വീകരിക്കാന് കുടുംബങ്ങള്ക്കൊപ്പം രാവിലെതന്നെ നൂറുകണക്കിന് ആരാധകരാണെത്തിയത്.
മനസുനിറയ്ക്കുന്ന സ്വീകരണമാണ് ലഭിച്ചതെന്ന് ശ്രീജേഷ് പ്രതികരിച്ചു. രാജ്യത്തിന് വേണ്ടി മെഡല് നേടി തിരിച്ചെത്തുമ്പോള് ഇത്തരത്തില് ലഭിക്കുന്ന സ്വീകരണമാണ് ഏതൊരു അത്ലറ്റിനെ സംബന്ധിച്ചും വലുതെന്നും താരം കൂട്ടിച്ചേര്ത്തു. പാരിസ് ഒളിംപിക്സ് സമാപന ചടങ്ങില് ഇന്ത്യന് പതാകയേന്താന് സാധിക്കുമെന്ന് ഒരിക്കലും വിചാരിച്ചിരുന്നില്ലെന്നും അത് കേക്കിന് മുകളിലെ ഒരു ചെറി പോലെയായിരുന്നുവെന്നും ശ്രീജേഷ് പറഞ്ഞു.
ബുധനാഴ്ച ഇന്ത്യൻ താരങ്ങൾക്ക് ഹോക്കി ഫെഡറേഷന്റെ ഔദ്യോഗിക സ്വീകരണവുമുണ്ട്. ഇന്ത്യന് ഹോക്കി ടീമിലെ ചില താരങ്ങള് കഴിഞ്ഞ ശനിയാഴ്ച തന്നെ നാട്ടിലെത്തിയിരുന്നു. ഒളിംപിക്സ് സമാപന പരിപാടിക്കായി പാരിസില് തുടര്ന്നതോടെയാണ് പി.ആര്. ശ്രീജേഷ് ഉള്പ്പടെയുള്ളവരുടെ വരവ് വൈകിയത്. സമാപന പരിപാടിയില് ഇന്ത്യന് പതാകയേന്തിയത് പി.ആര്. ശ്രീജേഷും മനു ഭാകറുമായിരുന്നു.
