തിരുവനന്തപുരം :വയനാട് ജില്ലയിലെ ദുരിതാശ്വാസ ക്യാമ്പുകളില് വിതരണം ചെയ്യുന്നതിനായി ആവശ്യത്തില് കൂടുതലാണ് ഇതിനകം ലഭിച്ചിട്ടുള്ള സാധനങ്ങളെനന്ന് മുഖ്യമന്ത്രി പിണറായി വിജയന്. ഈ പശ്ചാത്തലത്തില് ഇനിയും സാധനങ്ങള് ശേഖരിച്ച് അയക്കേണ്ടതില്ല.
പച്ചക്കറി, ബേക്കറി, മറ്റ് ഭക്ഷ്യവസ്തുക്കള് തുടങ്ങിയവ പെട്ടെന്ന് നശിച്ചു പോകുന്നതുകൊണ്ട് ഇവയുടെ സൂക്ഷിപ്പും വിതരണവും പ്രയാസം സൃഷ്ടിക്കുന്നുണ്ട്.
വയനാട്ടിലെ കളക്ഷന് സെന്ററില് എത്തിയ ഏഴു ടണ് തുണി ഉപയോഗിച്ചു പഴകിയതാണ്. അതു മുഴുവനും സംസ്കരിക്കാനായി അയക്കേണ്ടി വന്നത് കൂടുതല് ബുദ്ധിമുട്ട് സൃഷ്ടിച്ചു. ഉപകരിക്കാന് ചെയ്തതാകാമെങ്കിലും ഈ പ്രവൃത്തി ഫലത്തില് ഉപദ്രവമായി. ദുരന്തത്തില് പെട്ടവരെ പുനരധിവസിപ്പിക്കുന്നതിനുള്ള സാമ്പത്തിക സഹായങ്ങളാണ് ഇനിവേണ്ടത്. ഇത് മുഖ്യമന്ത്രിയുടെ ദുരിതാശ്വാസ നിധിയിലേക്ക് നേരിട്ട് നല്കുകയോ കളക്ടറേറ്റുകളില് ചെക്ക് / ഡ്രാഫ്റ്റ് മുഖേനയോ നല്കാന് കൂടുതല് ആളുകള് സന്നദ്ധരാകണമെന്ന് മുഖ്യമന്ത്രി പറഞ്ഞു.
ഉരുള്പൊട്ടലിന്റെ പശ്ചാത്തലത്തില് ക്യാമ്പുകളില് കഴിയുന്നവരുടെ താത്ക്കാലിക പുനരധിവാസം ഉറപ്പാക്കാന് പൊതുമരാമത്ത് വകുപ്പിന് കീഴിലെ 27 ക്വാട്ടേഴ്സുകള് ഉള്പ്പെടെ 91 സര്ക്കാര് ക്വാര്ട്ടേഴ്സുകള് ലഭ്യമാക്കും.
