ന്യൂദൽഹി: വിദേശകാര്യമന്ത്രി എസ്. ജയശങ്കറും ഒമാൻ വിദേശകാര്യമന്ത്രി ബദർ അൽബുസൈദിയും തമ്മിൽ ഫോൺ സംഭാഷണം നടത്തി. കഴിഞ്ഞയാഴ്ച മസ്‌കറ്റിൽ ഇന്ത്യക്കാരൻ ഉൾപ്പെടെ ആറ് പേരുടെ മരണത്തിനിടയാക്കിയ മാരകമായ വെടിവെപ്പ് സംഭവം ഇരുവരും ചർച്ച ചെയ്തു.
ഒമാൻ വിദേശകാര്യ മന്ത്രി അൽബുസൈദിയാണ് ജയശങ്കറിനെ വിളിച്ചത്. “ഒമാനിലെ എഫ്എം @badralbusaidi-ൽ നിന്നുള്ള കോളിനെ അഭിനന്ദിക്കുന്നു. ഒരു ഇന്ത്യൻ പൗരന്റെ ജീവൻ നഷ്ടപ്പെടുകയും മറ്റുള്ളവർക്ക് പരിക്കേൽക്കുകയും ചെയ്ത മസ്‌കറ്റ് വെടിവയ്‌പ്പ് സംഭവത്തെക്കുറിച്ച് ചർച്ച ചെയ്തു,”- ജയശങ്കർ ‘എക്‌സി’ൽ പറഞ്ഞു.
കഴിഞ്ഞ തിങ്കളാഴ്ച ഒമാൻ തലസ്ഥാനമായ മസ്‌കറ്റിലെ ഷിയ മുസ്ലീം പള്ളിക്ക് സമീപമാണ് വെടിവെപ്പുണ്ടായത്. സംഭവത്തിൽ കൊല്ലപ്പെട്ട ഇന്ത്യൻ പൗരൻ ബാഷ ജാൻ അലി ഹുസൈൻ ആണെന്ന് മസ്‌കറ്റിലെ ഇന്ത്യൻ എംബസി ബുധനാഴ്ച തിരിച്ചറിഞ്ഞു. ആക്രമണത്തിൽ മൂന്ന് ഇന്ത്യക്കാർക്കും പരിക്കേറ്റു.
വെടിവയ്‌പ്പിനെത്തുടർന്ന് ഇന്ത്യൻ നിവാസികളുടെ ക്ഷേമം സൂക്ഷ്മമായി നിരീക്ഷിക്കുന്നുണ്ടെന്ന് ഇന്ത്യൻ എംബസി അറിയിച്ചു.
