തിരുവനന്തപുരം: ലൈന്‍മാനെതിരെ പരാതി നല്‍കിയ കുടുംബത്തെ ഇരുട്ടിലാക്കി കെഎസ്ഇബിയുടെ പ്രതികാര നടപടി വീണ്ടും.
മദ്യപിച്ചെത്തി അസഭ്യം പറഞ്ഞ െൈലന്‍മാനെതിരെ പരാതി നല്‍കിയതിനാണ് കുടുംബത്തെ ഇരുട്ടിലാക്കിയതെന്നാണ് ആക്ഷേപം. തിരുവനന്തപുരം അയിരൂരിലാണ് കെഎസ്ഇബി നിയമം കയ്യിലെടുത്തത്.
അയിരൂര്‍ സ്വദേശി രാജീവന്റെ വീട്ടിലെ വൈദ്യുതി തകരാര്‍ പരിഹരിക്കാനെത്തിയ ജീവനക്കാര്‍ മദ്യപിച്ച് അസഭ്യം പറഞ്ഞു. ഇതിനെതിരെ പൊലീസില്‍ പരാതി നല്‍കിയതിനെ തുടര്‍ന്ന് ഇതുവരെ വൈദ്യുതി തകരാര്‍ പരിഹരിച്ചില്ല.
പരാതി പിന്‍വലിച്ചാല്‍ വൈദ്യുതി തകരാര്‍ പരിഹരിക്കാമെന്നാണ് അസിസ്റ്റന്റ് എന്‍ജീനിയര്‍ അറിയിച്ചതെന്ന് കുടുംബം പറയുന്നു. മദ്യപിച്ച് എത്തിയതിന് ജീവനക്കാര്‍ക്കെതിരെ പൊലീസ് കേസെടുത്തിട്ടുണ്ട്. ഇതിന് പിന്നാലെ വീട്ടുകാര്‍ക്കെതിരെ കെഎസ്ഇബിയും
പരാതി നല്‍കി. ഔദ്യോഗിക ജോലി തടസപ്പെടുത്തിയെന്നാണ് കെഎസ്ഇബിയുടെ പരാതി.
എന്നാല്‍, ഇന്നലെ രാത്രി മീറ്റര്‍ കത്തുന്നുവെന്ന് പരാതി ലഭിച്ചപ്പോള്‍ ഫീഡര്‍ ഓഫ് ഓഫ് ചെയ്തിട്ടു പരാതി പറഞ്ഞ വീട്ടിലേക്ക് പോയ കെടാകുളം സെക്ഷനിലെ രണ്ട് ലൈന്‍മാന്‍മാരെ അസഭ്യം വിളിക്കുകയും തിരികെ പോകാന്‍ സമ്മതിക്കാതെ തടഞ്ഞ് നിര്‍ത്തുകയും ചെയ്തുവെന്ന് കെഎസ്ഇബി പറയുന്നു. ജീവനക്കാര്‍ പൊലീസിനെ അറിയിക്കുകയും തുടര്‍ന്ന് പൊലീസ് എത്തിയപ്പോള്‍ ജീവനക്കാര്‍ മദ്യപിച്ചാണ് വന്നിരിക്കുന്നതെന്ന രീതിയില്‍ പരാതി കൊടുക്കുകയായിരുന്നു. എന്നാല്‍ മെഡിക്കല്‍ പരിശോധന നടത്തിയപ്പോള്‍ ഇവര്‍ മദ്യപിച്ചിട്ടില്ലെന്ന് പിന്നീട് വ്യക്തമായെന്നുമാണ് കെ എസ് ഇ ബിയുടെ വിശദീകരണം.
