ഹരാരെ: പത്ത് വിക്കറ്റ് വിജയത്തോടെ ഭാരതം സിംബാബ്‌വെയ്‌ക്കെതിരായ ട്വന്റി20 പരമ്പര സ്വന്തമാക്കി. ഇന്നലെ നടന്ന നിര്‍ണായക പോരാട്ടത്തില്‍ ആതിഥേയരായ സിംബാബ്‌വെ ഭാരതത്തിന് മുന്നില്‍ വച്ച 153 റണ്‍സിന്റെ വിജയലക്ഷ്യം 15.2 ഓവറില്‍ വിക്കറ്റ് നഷ്ടം കൂടാതെ മറികടന്നു.
സെഞ്ച്വറിക്ക് അടുത്തുവരെയെത്തിയ ഓപ്പണര്‍ യശസ്വി ജയ്‌സ്വാളിന്റെ പ്രകടനമാണ് ഭാരത വിജയം എളുപ്പമാക്കിയത്. 53 പന്തുകള്‍ നേരിട്ട താരം രണ്ട് സിക്‌സറും 13 ബൗണ്ടറികളുമടക്കം 93 റണ്‍സെടുത്തു. ഒപ്പം ഓപ്പണ്‍ ചെയ്ത നായകന്‍ ശുഭ്മാന്‍ ഗില്‍(58) അര്‍ദ്ധസെഞ്ചുറി പ്രകടനത്തോടെ അപരാജിതനായി നിന്നു.
പരമ്പരയില്‍ ഒരു മത്സരം കൂടി ബാക്കിനില്‍ക്കെയാണ് ഭാരതം പരമ്പര സ്വന്തമാക്കിയത്. നാല് മത്സരങ്ങള്‍ കഴിയുമ്പോള്‍ 3-1ന് മുന്നിലാണ് സന്ദര്‍ശകര്‍.
നേരത്തെ ടോസ് നേടിയ ഭാരതം എതിരാളികളെ ബാറ്റിങ്ങിന് വിടുകയായിരുന്നു. നായകന്‍ സിക്കന്ദര്‍ റാസയുടെ(46) മികവില്‍ സിംബാബ്‌വെ പൊരുതാവുന്ന സ്‌കോര്‍ കണ്ടെത്തുകയായിരുന്നു. 20 ഓവറില്‍ ഏഴ് വിക്കറ്റ് നഷ്ടത്തില്‍ ടീം 152 റണ്‍സെടുത്തു. ഭാരതത്തിനായി ഖലീല്‍ അഹമ്മദ് രണ്ട് വിക്കറ്റെടുത്തു.
