കോഴിക്കോട് : പാര്ട്ടിയില് നിന്ന് പുറത്താക്കിയതിന് പിന്നാലെ പി എസ് സി കോഴ ആരോപണം ഉന്നയിച്ച ശ്രീജിത്തിന്റെ വീടിന് മുന്നില് തുടങ്ങിയ സമരം അവസാനിപ്പിച്ച് പ്രമോദ് കോട്ടൂളി. അമ്മയ്ക്കും മകനും ശാരീരിക അസ്വസ്ഥതകള് ഉണ്ടെന്നും അതിനാല് തത്ക്കാലം വീട്ടിലേക്ക് മടങ്ങുകയാണെന്നും പ്രമോദ് കോട്ടൂളി പറഞ്ഞു.
തന്റെ നിരപരാധിത്വം തെളിയുന്നത് വരെ പോരാട്ടം തുടരുമെന്നും അതിന് എല്ലാ വഴികളും തേടുമെന്നും പ്രമോദ് കോട്ടൂളി പറഞ്ഞു.താന് 22 ലക്ഷം വാങ്ങി എങ്കില് തെളിവ് തരണം. പണം കൊടുത്തത് ആര് ആര്ക്ക് എന്ന് എപ്പോള് എവിടെ എന്ന് തന്റെ അമ്മയോട് ആരോപണം ഉന്നയിച്ച വ്യക്തി പറയണം എന്ന് പറഞ്ഞായിരുന്നു പ്രമോദ് പരാതിക്കാരന്റെ വീടിന് മുന്നില് പ്രതിഷേധിക്കാനെത്തിയത്
ശ്രീജിത്ത് തന്റെ പരിചയക്കാരനാണെന്ന് പ്രമോദ് പറഞ്ഞു. ഒരു കാരണവശാലും താന് പാര്ട്ടിയെ തള്ളിപ്പറയില്ലെന്നും പ്രമോദ് പറഞ്ഞു.
മന്ത്രി മുഹമ്മദ് റിയാസ് സഹോദര തുല്യനാണ്. ഒരു സഹോദരന് ഒരിക്കലും മറ്റൊരു സഹോദരനെ കശാപ്പ് ചെയ്യില്ലെന്നും അദ്ദേഹം പ്രതികരിച്ചിരുന്നു.
