തിരുവനന്തപുരം: പൊട്ടിവീണ കമ്പിയില്‍ നിന്ന് വൈദ്യുതാഘാതമേറ്റ് മരിച്ച നെയ്യാറ്റിന്‍കര ചായ്‌ക്കോട്ടുകോണം സ്വദേശി ബാബുവിന്റെ (65)കുടുംബത്തിന് കെഎസ്ഇബി 10 ലക്ഷം രൂപ അടിയന്തര സഹായധനം പ്രഖ്യാപിച്ചു. അഞ്ച് ലക്ഷം രൂപ ഉടന്‍ കൈമാറും. കഴിഞ്ഞ ദിവസമാണ് ബാബു ഷോക്കേറ്റ് മരിച്ചത്.
വീടിന് സമീപം വാഴത്തോട്ടത്തില്‍ പൊട്ടിക്കിടന്ന ലൈനില്‍ നിന്നാണ് ഷോക്കേറ്റത്. നാട്ടുകാര്‍ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. കാറ്റില്‍ ലൈന്‍ പൊട്ടിവീണത് കെഎസ് ഇബി ഓഫീസില്‍ അറിയിച്ചിട്ടും ഒരു നടപടിയും എടുത്തിരുന്നില്ലെന്ന് നാട്ടുകാര്‍ പരാതിപ്പെട്ടിരുന്നു.
കെ എസ് ഇ ബി കൊലപാതകമാണ് നടത്തിയതെന്നും ഉദ്യോഗസ്ഥര്‍ക്കെതിരെ നടപടി ഇല്ലെങ്കില്‍ സമരത്തിനിറങ്ങുമെന്നും ബാബുവിന്റെ സഹോദരി പ്രതികരിച്ചിരുന്നു. എന്നാല്‍ സംഭവത്തെക്കുറിച്ച് അന്വേഷണം നടക്കുകയാണെന്നും വീഴ്ച ഉണ്ടെങ്കില്‍ കുറ്റക്കാര്‍ക്കെതിരെ നടപടിയുണ്ടാകുമെന്നും മന്ത്രി കെ കൃഷ്ണന്‍ കുട്ടി പറഞ്ഞു.
വാഴത്തോട്ടത്തില്‍ വൈദ്യുതി ലൈന്‍ പൊട്ടിവീണെന്ന് നിരവധിവട്ടം ഉദ്യോഗസ്ഥരെ അറിയിച്ചിട്ടും ഒരാഴ്ച തിരിഞ്ഞു നോക്കാത്ത കെഎസ്ഇബി അധികൃതരുടെ അനാസ്ഥയ്‌ക്കെതിരെ കടുത്ത പ്രതിഷേധവുമായി ബന്ധുക്കളും നാട്ടുകാരും രംഗത്ത് വന്നിരുന്നു.നിരവധി വട്ടം പരാതിപ്പെട്ടപ്പോള്‍ രണ്ട് ജീവനക്കാരെത്തി ലൈനില്‍ വൈദ്യുതിയുണ്ടോ എന്നുപോലും നോക്കാതെ പ്രശ്‌നമൊന്നുമില്ലെന്ന് പറഞ്ഞ് സ്ഥലം വിട്ടെന്നും ആയിരുന്നു നാട്ടുകാര്‍ പറഞ്ഞത്.
