ടെക്സാസ്: കോപ്പ അമേരിക്ക ഫുട്ബോള് ചാമ്പ്യന്ഷിപ്പില് അമേരിക്ക ജയത്തോടെ തുടങ്ങി. ഗ്രൂപ്പ് സിയിലെ ആദ്യകളിയില് ബൊളീവിയയെ മറുപടിയില്ലാത്ത രണ്ട് ഗോളുകള്ക്ക് തോല്പ്പിച്ചു. വിജയികള്ക്കായി സൂപ്പര് താരം ക്രിസ്റ്റിയന് പുലിസിച്ച്, ഫൊളാരിന് ബലോഗന് എന്നിവര് ലക്ഷ്യം കണ്ടു.
കളിയില് വ്യക്തമായ ആധിപത്യം പുലര്ത്തിയ അമേരിക്ക മൂന്നാം മിനിറ്റില് തന്നെ സൂപ്പര് താരം ക്രിസ്റ്റ്യന് പുലിസിച്ചിലൂടെ ലീഡ് നേടി. തിമോത്തി വിയ എടുത്ത കോര്ണര് കിക്കാണ് ബോക്സിനുള്ളില് നിന്ന് പുലിസിച്ച് വലയിലെത്തിച്ചത്. തുടര്ന്നും നിരവധി അവസരങ്ങള് സൃഷ്ടിച്ചെങ്കിലും കൂടുതല് ഗോള് പിറന്നില്ല. ഒടുവില് 44-ാം മിനിറ്റില് അമേരിക്ക ലീഡ് ഉയര്ത്തി. ക്രിസ്റ്റിയന് പുലിസിച്ച് ഒരുക്കിയ അവസരത്തില് നിന്ന് ഫൊളാരിന് ബലോഗന് ബൊളീവിയന് വല കുലുക്കുകയായിരുന്നു. ഈ രണ്ട് ഗോളുകള്ക്ക് ആദ്യ പകുതിയില് അവര് മുന്നിട്ടുനിന്നു.
രണ്ടാം പകുതിയിലും മികച്ച മുന്നേറ്റങ്ങളുമായി അമേരിക്ക കളം നിറഞ്ഞെങ്കിലും കൂടുതല് ഗോള് ഉണ്ടായില്ല. രണ്ടാം പകുതിയില് ഒരിക്കല് കൂടി ബലോഗന് വല കുലുക്കിയെങ്കിലും ഓഫ്സൈഡ് കെണിയില് കുടുങ്ങി. തിരിച്ചുവരാനുള്ള ബൊളീവിയയുടെ ശ്രമങ്ങള് വിജയം കാണാതിരുന്നതോടെ ആതിഥേയര്ക്ക് നിര്ണായക വിജയവും മൂന്ന് പോയന്റും സ്വന്തമായി.
