കൊച്ചി: മാടവനയില് അപകടത്തില്പ്പെട്ട കല്ലട ബസില് ഗുരുതര പിഴവുകള് കണ്ടെത്തിയതായി മോട്ടോര് വാഹന വകുപ്പ്. ബസില് വേഗപ്പൂട്ട് വിച്ഛേദിച്ച നിലയിലായിരുന്നു. ബസിന്റെ പിന്നിലുളള ഇടത് വശത്തെ ടയറ് മോശമായിരുന്നുവെന്നും കണ്ടെത്തി. ബസ് അമിത വേഗതയിലായിരുന്നെന്നും മോട്ടോര് വകുപ്പ് അധികൃതര് അറിയിച്ചു.
അതിനിടെ മാടവനയില് ദേശീയപാതയില് ബസ് മറിഞ്ഞ് ഒരാള് മരിച്ച സംഭവത്തില് കല്ലട ബസിന്റെ ഡ്രൈവര് പാല്പ്പാണ്ടിയുടെ അറസ്റ്റ് പനങ്ങാട് പൊലീസ് രേഖപ്പെടുത്തി. നട്ടെല്ലിന് പരിക്കേറ്റ ഇയാള് സ്വകാര്യ ആശുപത്രിയില് ചികിത്സയിലാണ്.
ഇന്നലെയാണ് കൊച്ചി മാടവനയില് ദേശീയപാതയില് അന്തര്സംസ്ഥാന സ്വകാര്യ ബസ് മറിഞ്ഞ് ഒരാള് മരിക്കുകയും 13 പേര്ക്ക് പരിക്കേല്ക്കുകയും ചെയ്തത്.നിയന്ത്രണം വിട്ട ബസ് തെന്നിമറിഞ്ഞ് ബൈക്ക് യാത്രക്കാരനായ ഇടുക്കി വാഗമണ് സ്വദേശി ജിജോ സെബാസ്റ്റ്യന്റെ മുകളിലേക്ക് വീഴുകയായിരുന്നു. സിഗ്നലില് പെട്ടെന്ന് ബ്രേക്കിട്ടതാണ് ബസ് മറിയാന് കാരണം. ഇന്നലെ രാവിലെ പത്തുമണിയോടെ ബംഗളൂരുവില് നിന്ന് തിരുവനന്തപുരത്തേക്ക് പോവുകയായിരുന്ന കല്ലട ബസാണ് അപകടത്തില്പ്പെട്ടത്.
ബസിലുണ്ടായിരുന്ന 32 യാത്രക്കാരും ഒരു വശത്തേക്ക് വീണു. ഓടിക്കൂടിയ നാട്ടുകാരാണ് യാത്രക്കാരെ പുറത്തെടുത്തത്. പൊലീസും അഗ്നിശമന സേനയും എത്തിയാണ് ബസിനിടയില് കുടുങ്ങിക്കിടന്ന ജിജോ സെബാസ്റ്റ്യനെ പുറത്തെടുത്തത്. ആശുപത്രിയില് എത്തിച്ചങ്കെിലും ജീവന് രക്ഷിക്കാനായില്ല.
