ശ്രീനഗർ: കുപ്വാര ജില്ലയിലെ താങ്ധർ സെക്ടറിൽ നുഴഞ്ഞുകയറ്റ ശ്രമം സൈന്യം പരാജയപ്പെടുത്തി. സൈന്യത്തിന്റെ ആക്രമണത്തിൽ രണ്ട് നുഴഞ്ഞുകയറ്റ തീവ്രവാദികൾ കൊല്ലപ്പെട്ടു. അതിർത്തി കടക്കാനെത്തിയ തീവ്രവാദികളോട്സുരക്ഷാ സേന തിരികെ പോകാൻ ആവശ്യപ്പെട്ടു. എന്നാൽ അവർ വിസമ്മതിച്ചു. ഇത് വെടിവയ്പ്പിൽ കലാശിക്കുകയായിരുന്നു.
അതിർത്തിയുടെ മറുവശത്ത് രണ്ട് മൃതദേഹങ്ങൾ കിടക്കുന്നത് കണ്ടെങ്കിലും പുറത്തെടുക്കാനായില്ലെന്ന് ഉദ്യോഗസ്ഥർ പറഞ്ഞു. 4-5 നുഴഞ്ഞുകയറ്റക്കാർ രാത്രിയിൽ നുഴഞ്ഞുകയറാൻ ശ്രമിച്ചതായും താങ്ധർ സെക്ടറിലെ നിയന്ത്രണ രേഖ വേലിക്ക് സമീപം ജാഗ്രത പുലർത്തുന്ന സൈന്യം വെല്ലുവിളിച്ചതായും ഉദ്യോഗസ്ഥർ പറഞ്ഞു.
അവർ സൈന്യത്തിന് നേരെ വെടിയുതിർക്കുകയായിരുന്നുവെന്നും രാവിലെ രണ്ട് തീവ്രവാദികളുടെ മൃതദേഹങ്ങൾ വേലിക്ക് അരികിൽ കിടക്കുന്നത് കണ്ടതായും അദ്ദേഹം പറഞ്ഞു. ഈ മൃതദേഹങ്ങൾ വീണ്ടെടുക്കാൻ കഴിഞ്ഞിട്ടില്ലെന്നും മറ്റ് തീവ്രവാദികൾ തിരികെ രക്ഷപ്പെടാൻ സാധ്യതയുണ്ടെന്നും അദ്ദേഹം പറഞ്ഞു. എന്നാൽ പ്രദേശത്ത് തെരച്ചിൽ തുടരുകയാണെന്ന് അദ്ദേഹം കൂട്ടിച്ചേർത്തു.
