കൊല്ലം:പ്രണയം നടിച്ച് യുവതിയെ ലൈംഗികമായി പീഡിപ്പിക്കുകയും സ്വകാര്യ ദൃശ്യങ്ങള്‍ സാമൂഹിക മാധ്യമങ്ങള്‍ വഴി പ്രചരിപ്പിക്കുകയും ചെയ്ത കേസില്‍ യുവാവ് അറസ്റ്റില്‍. ഏരൂരിലാണ് സംഭവം.
ഏരൂര്‍ അയിലറയില്‍ ജിത്ത് (26) ആണ് പിടിയിലായത്. ഏരൂര്‍ സ്വദേശിനി 25 കാരിയുടെ പരാതിയിലാണ് ജിത്തിനെ അറസ്റ്റ് ചെയ്തത്.
2022 ജൂലായ് മുതല്‍ യുവതിയെ പലതവണ പീഡിപ്പിച്ചെന്നാണ് പരാതി. വീട്ടില്‍ കൊണ്ടുപോയി ലഹരിപാനീയം നല്‍കിയും പീഡിപ്പിച്ചു. ഇതിനിടെ സ്വകാര്യ ദൃശ്യങ്ങള്‍ പകര്‍ത്തി അത് കാട്ടി ഭീഷണിപ്പെടുത്തി കോവളത്തെ ഹോട്ടലില്‍ എത്തിച്ചും പീഡനം തുടര്‍ന്നു.
പിന്നീട് ദൃശ്യങ്ങള്‍ പെണ്‍കുട്ടിയുടെ അമ്മയ്‌ക്ക് അയച്ച് ഭീഷണിപ്പെടുത്തി പണം തട്ടി. സ്വന്തം സുഹൃത്തുക്കള്‍ക്കും ജിത്ത് ദൃശ്യങ്ങള്‍ അയച്ചു നല്‍കി. ഭീഷണിയില്‍ വലഞ്ഞതോടെ സഹികെട്ട് പെണ്‍കുട്ടിയും കുടുംബവും പൊലീസില്‍ പരാതി നല്‍കി. കേസെടുത്തതോടെ വിദേശത്തേക്ക് കടക്കാന്‍ ശ്രമിച്ച പ്രതിക്കെതിരെ ഏരൂര്‍ പൊലീസ് ലുക്ക്ഔട്ട് നോട്ടീസിറക്കി.
ഇതറിയാതെ വിമാനത്താവളത്തില്‍ എത്തിയ ജിത്തിനെ പൊലീസ് പിടികൂടുകയായിരുന്നു.
