തൃശൂര് : ഗൃഹനാഥനെ കരുതല് തടവിലാക്കി വീട് ജപ്തി ചെയ്ത് ബാങ്ക് അധികൃതര് .പൊലീസ് സന്നാഹത്തോടെയാണ് നടപടികള് പൂര്ത്തീകരിച്ചത്.
പുത്തന്പീടിക സ്വദേശി ചക്കിത്തറ വീട്ടില് സുരേഷിന്റെ വീട് ആണ് ജപ്തി ചെയ്തത്. ആത്മഹത്യ ഭീഷണി മുഴക്കിയ ഭാര്യയേയും മക്കളേയും വാതില് പൊളിച്ച് ബലമായി പുറത്തിറക്കിയ ശേഷമാണ് നടപടികള് പൂര്ത്തിയാക്കിയത്.
നാടകീയമായ നീക്കങ്ങളിലൂടെയാണ് ജപ്തി നടപടികള് പൂര്ത്തിയാക്കിയത്. ബാങ്ക് അധികൃതര് ജപ്തി ചെയ്യാന് എത്തിയാല് കുടുംബം ആത്മഹത്യയ്ക്ക് ശ്രമിക്കും എന്ന് സ്പെഷ്യല് ബ്രാഞ്ച് റിപ്പോര്ട്ടുണ്ടായിരുന്നു.ഈ സാഹചര്യത്തില് സുരേഷിനെ രാവിലെ പൊലീസ് കസ്റ്റഡിയിലെടുത്തു. പിന്നാലെ 20ലേറെ പൊലീസുകാര് വീട്ടിലെത്തി. ഇത് കണ്ട് വാതിലടച്ച സുരേഷിന്റെ ഭാര്യയും മക്കളും ആത്മഹത്യക്ക് ശ്രമിക്കുമെന്ന് ഭീഷണിപ്പെടുത്തിയതോടെ വാതില് തകര്ത്ത് പൊലീസ് അകത്തുകയറി.
