മലപ്പുറം: രാജ്യത്തിനകത്തും പുറത്തുമായി നിരവധി ഓണ്‍ലൈന്‍ തട്ടിപ്പുകള്‍ നടത്തിയ സംഘത്തിലെ പ്രധാന കണ്ണിയെ പിടികൂടി. കര്‍ണാടകയിലെ മടിക്കേരിയില്‍ നിന്ന് അബ്ദുള്‍ റോഷന്‍ എന്നയാളാണ് പിടിയിലായത്.
മടിക്കേരിയില്‍ സ്വകാര്യ മൊബൈല്‍ കമ്പനിയുടെ വിതരണക്കാരനാണ് പ്രതി. ഇയാളില്‍ നിന്നും 40000 സിം കാര്‍ഡുകള്‍, 150 മൊബൈല്‍ ഫോണുകള്‍, ബയോമെട്രിക് സ്‌കാനറുകള്‍ എന്നിവ കണ്ടെത്തി. ലക്ഷക്കണക്കിന് രൂപയാണ് റോഷന്‍ തട്ടിയെടുത്തതെന്നാണ് വിവരം.
സംഘത്തിലെ മറ്റുളളവരെ കുറിച്ച് പൊലീസിന് വിവരം ലഭിച്ചിട്ടുണ്ട്. നിക്ഷേപ തട്ടിപ്പ് നടത്തുന്ന സംഘത്തിന് സിം കാര്‍ഡ് നല്‍കുകയാണ് അബ്ദുള്‍ റോഷന്‍ ചെയ്തതെന്ന് പൊലീസ് പറയുന്നു. മടിക്കേരി പൊലീസും ഇയാള്‍ക്കെതിരെ തട്ടിപ്പ് കേസെടുത്തിട്ടുണ്ട്.
നിലവില്‍ ആക്റ്റീവായ 1500 സിം കാര്‍ഡുകാള്‍ പൊലീസ് പിടിച്ചെടുത്തവയില്‍ ഉള്‍പ്പെടുന്നു.ഇതിന് പുറമെ ആക്ടീവാക്കാനുള്ള 2000 സിം കാര്‍ഡുകളും കണ്ടെത്തിയിട്ടുണ്ട്. ഒരു സിമ്മിന് 50 രൂപ വീതം ഈടാക്കിയാണ് റോഷന്‍ സിം കാര്‍ഡ് നിക്ഷേപ തട്ടിപ്പ് സംഘത്തിന് നല്‍കിയതെന്നാണ് വിവരം. ഈ സിം കാര്‍ഡുകള്‍ ഇട്ടാല്‍ ഐഎംഇ നമ്പര്‍ മാറ്റാന്‍ കഴിയുന്ന ചൈനീസ് ഫോണുകളും പിടിച്ചെടുത്തു.
