കോട്ടയം: കൊട്ടിക്കലാശത്തിനൊപ്പം ജന്മദിനാഘോഷവും നടത്തി കോട്ടയത്തെ എന്‍ഡിഎ സ്ഥാനാര്‍ത്ഥി തുഷാര്‍ വെള്ളാപ്പള്ളി. വോട്ടെടുപ്പിന്റെ പരസ്യപ്രചാരണം അവസാനിക്കുന്ന ദിവസം തന്നെയായിരുന്നു തുഷാര്‍ വെള്ളാപ്പള്ളിയുടെ ജന്മദിനവും. പ്രവര്‍ത്തകര്‍ക്കൊപ്പം കേക്കുമുറിച്ച് അദ്ദേഹം ജന്മദിനം ആഘോഷിച്ചു. കൊട്ടിക്കലാശത്തിന് ചിങ്ങവനത്തുനിന്ന് റോഡ് ഷോ ആയാണ് തുഷാര്‍ തിരുനക്കര മൈതാനത്ത് എത്തിയത്.
കോട്ടയത്ത് 100% വിജയപ്രതീക്ഷയാണ് ഉള്ളതെന്ന് ബിജെപി ജില്ലാ പ്രസിഡണ്ടും എന്‍ഡിഎ തെരഞ്ഞെടുപ്പ് കമ്മിറ്റി ചെയര്‍മാനുമായ ലിജിന്‍ ലാല്‍ പറഞ്ഞു. സാധാരണക്കാര്‍ക്കിടയില്‍ പ്രവര്‍ത്തിക്കുന്ന നേതാവാണ് തുഷാര്‍ വെള്ളാപ്പള്ളി. വികസനം ആഗ്രഹിക്കുന്ന കോട്ടയത്തുകാര്‍ അദ്ദേഹത്തെ തിരഞ്ഞെടുക്കും. വികസന രാഷ്‌ട്രീയമാണ് തങ്ങള്‍ മുന്നോട്ടുവച്ചതെന്നും ലിജിന്‍ ലാല്‍ പറഞ്ഞു.
തുഷാര്‍ വെള്ളാപ്പള്ളിയുടെ ഭാര്യ ആശാ തുഷാര്‍, അമ്മയും വെള്ളാപ്പള്ളി നടേശന്റെ ഭാര്യയുമായ പ്രീതി നടേശന്‍ എന്നിവര്‍ കോട്ടയം മണ്ഡലത്തില്‍ പ്രവര്‍ത്തകരെ കാണുകയും കോര്‍ണര്‍ യോഗങ്ങളില്‍ പങ്കെടുക്കുകയും ചെയ്തു. ആശാ തുഷാര്‍ കലാശക്കൊട്ടിലെ റോഡ് ഷോയിലും പങ്കെടുത്തു. കുടുംബയോഗങ്ങള്‍ കേന്ദ്രീകരിച്ചാണ് മുഖ്യമായും പ്രവര്‍ത്തിച്ചത്.
