പാലക്കാട്: എടക്കാട് യുവക്ഷേത്ര ഇന്‍സ്റ്റിറ്റിയൂട്ട് ഓഫ് മാനേജ്മെന്റ് സ്റ്റഡീസില്‍ നടന്ന 48-ാമത് കേരള സംസ്ഥാന പുരുഷ-വനിത ജൂനിയര്‍ ബാസ്‌ക്കറ്റ് ബോള്‍ ചാമ്പ്യന്‍ഷിപ്പില്‍ എറണാകുളം വനിതകളും തിരുവനന്തപുരം പുരുഷന്‍മാരും ജേതാക്കളായി.
വനിതകളുടെ ഫൈനലില്‍ 26-18ന് പകുതി സമയം മുന്നിട്ടുനിക്കുന്ന ശേഷം തൃശ്ശൂരിനെ 53-47ന് പരാജയപ്പെടുത്തി എറണാകുളം ജേതാക്കളായി. 17 പോയിന്റുമായി അമാന്‍ഡ മരിയ റോച്ച എറണാകുളത്തിന്റെ ടോപ് സ്‌കോററായി. തൃശൂരിനായി ലിയ സോമി 20 പോയിന്റും നേടി.
പുരുഷന്‍മാരുടെ ഫൈനലില്‍ 27-28ന് പിന്നിലായ ശേഷം തിരുവനന്തപുരം അന്‍വിന്‍ ജോര്‍ജിലൂടെ ശക്തമായി തിരിച്ചുവരികയും മൂന്നാം പാദം അവസാനിച്ചപ്പോള്‍ 46-42 ന് ലീഡ് നേടുകയും ചെയ്തു. അവസാനം 61-58 ന് ചാമ്പ്യന്‍ഷിപ്പ് കരസ്ഥമാക്കുകയും ചെയ്തു.
മൂന്നാം സ്ഥാനത്തിനായി നടന്ന മത്സരത്തില്‍ കോഴിക്കോട് കൊല്ലത്തെ (71-54) തോല്‍പിച്ചപ്പോള്‍ കോട്ടയം ആലപ്പുഴയെ (36-35) തോല്‍പിച്ചു. വെങ്കലം നേടി.
ടൂര്‍ണമെന്റിലെ ഏറ്റവും വിലപിടിപ്പുള്ള താരങ്ങളായി എറണാകുളത്ത് നിന്നുള്ള അമന്‍ഡ മരിയ റോച്ചയെയും തിരുവനന്തപുരത്ത് നിന്നുള്ള അന്‍വിന്‍ ജോര്‍ജ് ജോസഫിനെയും തിരഞ്ഞെടുത്തു. പ്രോമിസിംഗ് പ്ലെയര്‍ അവാര്‍ഡ് തൃശൂര്‍ സ്വദേശി നിര്‍ണ്ണജനയ്‌ക്കും ആലപ്പുഴയില്‍ നിന്നുള്ള അശ്വിന്‍ കൃഷ്ണയ്‌ക്കും ലഭിച്ചു.
