കോട്ടയം: ‘കേരളാ സ്റ്റോറി’ പള്ളികളില്‍ പ്രദര്‍ശിപ്പിച്ച ഇടുക്കി രൂപതയ്‌ക്കും ചിത്രം പ്രദര്‍ശിപ്പിക്കുമെന്ന് പറഞ്ഞിരുന്ന താമരശ്ശേരി, തലശ്ശേരി രൂപതകള്‍ക്കുമെതിരെ സി.പി.എം. നേതാവ് ജെയ്‌ക്ക് സി.തോമസിന്‌റെ അധിക്‌ഷേപം. ലവ് ജിഹാദും കേരളാ സ്റ്റോറിയും പച്ചക്കള്ളമാണെന്നും കല്ലുവെച്ച നുണയും പരമ നെറികേടുമാണെന്നുമാണ് ഫേസ്ബുക്ക് പോസ്റ്റിലൂടെയുള്ള പ്രതികരണം. ഇത് പ്രദര്‍ശിപ്പിക്കുന്ന ക്രൈസ്തവ സഭാധികൃതരെ കണക്കറ്റ് പരോക്ഷമായി പരിഹസിക്കുന്നുമുണ്ട്.
വിഷം നിറച്ചൊരു എല്ലിന്‍ കഷ്ണം മാത്രമായ കേരളാ സ്റ്റോറിയുടെ പ്രചാരകര്‍ എന്ന മട്ടിലുള്ള ഉപമകളും വൈദികര്‍ക്കെതിരെ ജെയ്‌ക് ഉപയോഗിക്കുന്നു. ‘കപടഭക്തിക്കാരായ ശാസ്ത്രിമാരും പരീശന്മാരുമായുള്ളോരേ, നിങ്ങള്‍ക്കു ഹാ കഷ്ടം; വെള്ളതേച്ച ശവക്കല്ലറകളോടു നിങ്ങള്‍ ഒത്തിരിക്കുന്നു’ എന്ന ബൈബിള്‍ വാക്യത്തോടെയാണ് ജെയ്‌ക്ക് തന്റെ ഫേസ്ബുക്ക് പോസ്റ്റ് ആരംഭിക്കുന്നത്. തുടര്‍ന്ന് ക്രിസ്ത്യന്‍ വിഭാഗത്തില്‍പെട്ടവര്‍ നേരിട്ട വിവിധ അതിക്രമങ്ങള്‍ എടുത്തു പറയുന്നു. ‘ദി റിയല്‍ മണിപ്പുര്‍ സ്റ്റോറി’ എന്ന അടിക്കുറിപ്പോടെ ഒരു ചിത്രം പോസ്റ്റ് ചെയ്തിട്ടുമുണ്ട്.
