ന്യൂദല്ഹി : കുഞ്ഞിന്റെ ജനന രജിസ്ട്രേഷന് നടത്താന് മാതാപിതാക്കളുടെ മതം പ്രത്യേകം രേഖപ്പെടുത്തണമെന്ന് കേന്ദ്ര ആഭ്യന്തര മന്ത്രാലയം. ഇതിന്റെ കരട് ചട്ടം കേന്ദ്രസര്ക്കാര് പുറത്തിറക്കി. നേരത്തേ കുടുംബത്തിന്റെ മതം മാത്രമായിരുന്നു ജനന സര്ട്ടിഫിക്കറ്റില് രേഖപ്പെടുത്തിയിരുന്നത്.
കുട്ടിയുടെ ജനനം രജിസ്ട്രേഷന് നടത്തുമ്പോള് പിതാവിന്റെയും മാതാവിന്റെയും മതം പ്രത്യേകം രേഖപ്പെടുത്താന് ഇനി മുതല് കോളങ്ങള് ഉണ്ടാകും.ഈ നിയമം കുട്ടിയെ ദത്തെടുക്കലിലും ബാധകമാകും.
നിയമം പ്രാബല്യത്തിലാകും മുമ്പ് സംസ്ഥാന സര്ക്കാരുകള് വിജ്ഞാപനം ചെയ്യണം. സംസ്ഥാന സര്ക്കാര് അംഗീകാരവും വേണം.
സ്കൂള് പ്രവേശനം, ഡ്രൈവിംഗ് ലൈസന്സ്, വോട്ടര് പട്ടിക, ആധാര് നമ്പര്, വിവാഹ രജിസ്ട്രേഷന്, സര്ക്കാര് ജോലിയിലെ നിയമനംഎന്നിവയ്ക്ക് ജനന സര്ട്ടിഫിക്കറ്റ് ഒരൊറ്റ രേഖയായി ഉപയോഗിക്കാന് അനുവദിക്കുന്ന ജനന-മരണ രജിസ്ട്രേഷന് ഭേദഗതി ബില് 2023 കഴിഞ്ഞ വര്ഷകാലസമ്മേളനത്തില് പാര്ലമെന്റ് പാസാക്കിയിരുന്നു. പൊതുസേവനങ്ങളും സാമൂഹിക ആനുകൂല്യങ്ങളും കാര്യക്ഷമവും സുതാര്യവുമായി വിതരണം ചെയ്യാന് ഇത് സഹായിക്കുമെന്നാണ് സര്ക്കാര് വിലയിരുത്തല്.
