ലക്നൗ: നടപ്പാക്കാനാകില്ലെന്ന് കരുതിയ പലതും എന്ഡിഎ സര്ക്കാര് നടപ്പിലാക്കിയെന്ന് പ്രധാനമന്ത്രി നരേന്ദ്രമോദി. അയോധ്യയില് ഇത്തവണ രാംലല്ലയും ഹോളി ആഘോഷിച്ചു. മുത്തലാഖ് നിരോധിച്ച് മുസ്ലീം സ്ത്രീകളുടെ അവകാശം സംരക്ഷിച്ചുവെന്നും അദ്ദേഹം മീററ്റില് പറഞ്ഞു.ഉത്തര്പ്രദേശില് ലോകസഭാ തെരഞ്ഞെടുപ്പ് പ്രചാരണാര്ത്ഥമുളള എന് ഡി എ റാലിയില് സംസാരിക്കുകയായിരുന്നു അദ്ദേഹം.
ഇന്ത്യയെ വികസിത രാജ്യമാക്കാനുള്ള തെരഞ്ഞെടുപ്പാണിത്. അഴിമതിക്കാരെ ഇല്ലാതാക്കണമെന്നും നരേന്ദ്രമോദി പറഞ്ഞു. അഴിമതിക്കാരില് നിന്ന് ഇഡി പിടിച്ചെടുത്ത പണം രാജ്യത്തെ സാധാരണക്കാര്ക്ക് തിരിച്ചുനല്കുമെന്നും മോദി ആവര്ത്തിച്ചു.
അഴിമതിക്കാരെ സംരക്ഷിക്കാനാണ് പ്രതിപക്ഷ നീക്കം. അഴിമതിക്കാരുടെ ഇന്ത്യ സഖ്യത്തെ ഭയമില്ലെന്നും നരേന്ദ്രമോദി പറഞ്ഞു. അഴിമതിക്കാരെ പിടിക്കുന്നത് അവസാനിപ്പിക്കില്ലെന്ന ഗ്യാരന്റി നല്കുന്നു. വന് അഴിമതിക്കാര് ജയിലിലായി. കച്ചത്തീവ് ഇന്ത്യയില് നിന്ന് വെട്ടിമുറിച്ചത് കോണ്ഗ്രസാണ്. ഇന്ത്യ വിഭജിച്ച ഐ എന് ഡി ഐ എ സഖ്യത്തെ എങ്ങനെ വിശ്വസിക്കുമെന്നും മോദി ചോദിച്ചു.
