ന്യൂദല്‍ഹി : സവാളയുടെ കയറ്റുമതി നിരോധനം കേന്ദ്രസര്‍ക്കാര്‍ നീട്ടി. നേരത്തെ ഈ മാസം 31 വരെയാണ് നിരോധനം ഏര്‍പ്പെടുത്തിയിരുന്നു. ആഭ്യന്തര ലഭ്യത കൂട്ടുന്നതിനും വില പിടിച്ചുനിര്‍ത്തുന്നതിനുമായി ഏര്‍പ്പെടുത്തിയ കയറ്റുമതി വിലക്ക് ഇനിയൊരു അറിയിപ്പുണ്ടാകും വരെ നീട്ടിയതായി ഡയറക്ടറേറ്റ് ജനറല്‍ ഓഫ് ഫോറിന്‍ ട്രേഡ് അറിയിച്ചു.
സവാളയുടെ വില ക്രമാതീതമായി വര്‍ധിച്ചതിനെ തുടര്‍ന്ന് കഴിഞ്ഞ ഡിസംബര്‍ 8 നാണ് കേന്ദ്ര സര്‍ക്കാര്‍ കയറ്റുമതി നിരോധിച്ചത്. ഇതിനിടെ നാഷണല്‍ കോഓപ്പറേറ്റീവ് എക്സ്പോര്‍ട്ട് ലിമിറ്റഡ് വഴി യുഎഇയിലേക്കും ബംഗ്ലാദേശിലേക്കും 64,400 ടണ്‍ ഉള്ളി കയറ്റുമതി ചെയ്യാന്‍ സര്‍ക്കാര്‍ അനുമതി നല്‍കി. കയറ്റുമതി നിരോധിച്ചതില്‍ കര്‍ഷകരും അതൃപ്തി പ്രകടിപ്പിച്ചിരുന്നു.
യുഎഇയിലേക്ക് സവാള കയറ്റുമതി ചെയ്യുന്നതിനുള്ള നിരോധനം ഈ മാസം ആദ്യം ഇന്ത്യ പിന്‍വലിച്ചിരുന്നു 14,400 ടണ്‍ സവാളയാണ് യു.എ.ഇയിലേക്ക് കയറ്റുമതിക്ക് കേന്ദ്ര സര്‍ക്കാര്‍ അനുവദിച്ചിട്ടുള്ളത്. ഓരോ മൂന്നു മാസത്തിലും 3,600 ടണ്‍ കയറ്റുമതി ചെയ്യും. മാര്‍ച്ച് വരെ സവാള കയറ്റുമതി നിരോധിച്ചെങ്കിലും കേന്ദ്ര സര്‍ക്കാര്‍ പ്രത്യേക അനുമതിയുടെ അടിസ്ഥാനത്തില്‍ സവാള കയറ്റുമതി അനുവദിക്കുകയായിരുന്നു.
