പോര്ട്ട് ലൂയിസ്(മൗറീഷ്യസ്): രാഷ്ട്രപതി ദ്രൗപദി മുര്മു മൂന്നു ദിവസത്തെ ഔദ്യോഗിക സന്ദര്ശനത്തിനായി മൗറീഷ്യസില് എത്തി. സര് സീവൂസാഗൂര് രാംഗൂലം അന്താരാഷ്ട്ര വിമാനത്താവളത്തില് എത്തിയ രാഷ്ട്രപതിയെ മൗറീഷ്യസ് പ്രധാനമന്ത്രി പ്രവിന്ദ് കുമാര് ജഗനാഥിന്റെ നേതൃത്വത്തില് സ്വീകരിച്ചു. മൗറീഷ്യസിന്റെ ദേശീയ ദിനാചരണത്തിലും രാഷ്ട്രപതി മുഖ്യാതിഥിയായി.
മൗറീഷ്യസ് പ്രസിഡന്റ് പൃഥ്വിരാജ്സിങ് രൂപണുമായി രാഷ്ട്രപതി കൂടിക്കാഴ്ച നടത്തി. കൂടിക്കാഴ്ചയ്ക്കുശേഷം ലെ റെഡ്യൂയിറ്റിലെ സ്റ്റേറ്റ് ഹൗസിലെ ആയുര്വേദ ഉദ്യാനം രാഷ്ട്രപതി സന്ദര്ശിച്ചു. സര് സീവൂസാഗൂര് രാംഗൂലത്തിന്റെയും സര് അനീറൂദ് ജഗനാഥിന്റെയും സമാധിയില് പുഷ്പചക്രം അര്പ്പിച്ചു. വൈകിട്ട് പ്രവിന്ദ് കുമാര് ജഗന്നാഥുമായി കൂടിക്കാഴ്ച നടത്തിയ രാഷ്ട്രപതി അദ്ദേഹം ഒരുക്കിയ വിരുന്നിലും പങ്കെടുത്തു. മൗറീഷ്യസ് സര്വകലാശാല ഹോണററി ഡോക്ടറേറ്റ് ബിരുദം നല്കി രാഷ്ട്രപതി ദ്രൗപദി മുര്മുവിനെ ആദരിച്ചു.
