ധരംശാല: ഇംഗ്ലണ്ടിനെതിരായ അഞ്ചാം ടെസ്റ്റില്‍ ഭാരതത്തിന് ജയം, പരമ്പര. അവസാന മത്സരത്തില്‍ ഇന്നിംഗ്‌സിലും 64 റണ്‍സിനുമാണ് ഭാരതം ജയിച്ചത്. ഒന്നാം ഇന്നിങ്‌സില്‍ ഉയര്‍ത്തിയ 477 റണ്‍സ് വിജയലക്ഷ്യത്തിലേക്ക് ബാറ്റേന്തിയ ഇംഗ്ലണ്ടിന് രണ്ടാം ഇന്നിങ്‌സില്‍ 195 റണ്‍സെടുക്കാനേ ആയുള്ളൂ. ഇതോടെ വന്‍ തോല്‍വി വഴങ്ങേണ്ടിവന്നു. 218 ആയിരുന്നു ഇംഗ്ലണ്ടിന്റെ ഒന്നാം ഇന്നിങ്‌സ് സ്‌കോര്‍.
ഇന്നിങ്‌സില്‍ നാലും രണ്ടാം ഇന്നിങ്‌സില്‍ അഞ്ചും വിക്കറ്റുകള്‍ നേടിയ അശ്വിനാണ് ഇംഗ്ലണ്ടിന്റെ കഥകഴിക്കുന്നതില്‍ നിര്‍ണായകമായ പങ്കുവഹിച്ചത്.അശ്വിനാണ് കളിയിലെ താരം. പരമ്പരയുടെ താരമായി ജയ്‌സ് വാളും തെരഞ്ഞെടുക്കപ്പെട്ടു.
അഞ്ച് മത്‌സരങ്ങളിലും ഫലം കണ്ട പരമ്പര 4-1ന് ഭാരതം സ്വന്തമാക്കി. ആദ്യ ടെസ്റ്റില്‍ മാത്രമാണ് ഇംഗ്ലണ്ടിന് ജയിക്കാന്‍ സാധിച്ചിരുന്നത്. അതും ഒന്നാം ഇന്നിംഗ്‌സ് ലീഡ് നേടിയ ശേഷം ഭാരകം അപ്രതീ്ക്ഷിതമായി തോല്‍ക്കുകയായിരുന്നു.
സ്പിന്നര്‍മാര്‍ അരങ്ങുവാണ ആദ്യ ഇന്നിംഗ്‌സിന് ശേഷം രണ്ടാം ഇന്നിംഗ്‌സിലും ഇംഗ്ലണ്ടിന് സ്പിന്നര്‍മാര്‍ തകര്‍ക്കുന്ന കാഴ്ചയായിരുന്നു. 2ാം ഓവറില്‍ ആര്‍ അശ്വിന്‍ ബെന്‍ ഡക്കെറ്റിനെ രണ്ട് റണ്‍സില്‍ നില്‍ക്കേ ബൗള്‍ഡാക്കി തുടങ്ങി. കൃത്യമായ ഇടവേളകളില്‍ സാക്ക് ക്രോലി (16 പന്തില്‍ 0), ഓലീ പോപ് (23 പന്തില്‍ 19) എന്നിവരെയും അശ്വിന്‍ മടക്കിയതോടെ ഇംഗ്ലണ്ട് 3 ന് 36 എന്ന നിലയിലായി. ഇതിന് ശേഷം ജോ റൂട്ടിനൊപ്പം വേഗം സ്‌കോറിംഗിന് ശ്രമിക്കവെ ജോണി ബെയ്ര്‍സ്‌റ്റോയെ കുല്‍ദീപ് എല്‍ബിയില്‍ കുടുക്കിയതോടെ ഇംഗ്ലണ്ട് കൂടുതല്‍ പ്രതിസന്ധിയിലായി. വീണ്ടും പന്തെടുത്തപ്പോള്‍ ക്യാപ്റ്റന്‍ ബെന്‍ സ്‌റ്റോക്‌സിനെ ( 2) ബെന്‍ ഫോക്്‌സിനയും(2)ബൗള്‍ഡാക്കി അശ്വിന്‍ അഞ്ച്് വിക്കറ്റ് തികച്ചു.
ടോം ഹാര്‍ട്ട്‌ലി (20), മാര്‍ക്ക് വുഡ് (പൂജ്യം) എന്നിവരെ ജസ്പ്രീത് ബുംറയും ജോണി ബെയര്‍സ്‌റ്റോ (39), ജോ റൂട്ട് (84) എന്നിവരെ കുല്‍ദീപും മടക്കിയയച്ചു. രവീന്ദ്ര ജഡേജയ്‌ക്കാണ് ഷുഐബ് ബഷീറിന്റെ (13) വിക്കറ്റ്.
ഇംഗ്ലണ്ട് നിരയില്‍ ജോ റൂട്ടിന് (84) മാത്രമാണ് പിടിച്ചുനില്‍ക്കാന്‍ സാധിച്ചത്. ജോണി ബെയര്‍സ്‌റ്റോ (39), ഒല്ലി പോപ് (19), ടോം ഹാര്‍ട്‌ലി (20), ഷൊയ്ബ് ബഷീര്‍ (13) എന്നിവരാണ് രണ്ടക്കം കണ്ട മറ്റുതാരങ്ങള്‍.
ഭാരതം 259 റണ്‍സിന്റെ ഒന്നാം ഇന്നിംഗ്‌സ് ലീഡ് സ്വന്തമാക്കുകയായിരുന്നു. ഇംഗ്ലണ്ടിന്റെ ആദ്യ ഇന്നിംഗ്‌സ് സ്‌കോറായ 218 റണ്‍സ് പിന്തുടര്‍ന്ന ഭാരതം 124.1 ഓവറില്‍ 477 റണ്‍സില്‍ പുറത്തായി. 8 വിക്കറ്റ് നഷ്ടത്തില്‍ 473എന്ന സ്‌കോറില്‍ മൂന്നാംദിനം ബാറ്റിംഗ് പുനരാരംഭിച്ച ഭാരതത്തിന് നാല് റണ്‍സ് കൂടിയേ ചേര്‍ക്കാനായുള്ളൂ. ഇതിനിടെ ഇംഗ്ലീഷ് പേസ് ഇതിഹാസം ജെയിംസ് ആന്‍ഡേഴ്‌സണ്‍ 700 ടെസ്റ്റ് വിക്കറ്റുകള്‍ തികച്ചു. എഴുന്നൂറ് വിക്കറ്റ് ക്ലബിലെത്തുന്ന ആദ്യ പേസറാണ് ആന്‍ഡേഴ്‌സണ്‍. ഇംഗ്ലണ്ടിനായി സ്പിന്നര്‍ ഷൊയൈബ് ബഷീര്‍ അഞ്ച് വിക്കറ്റുകള്‍ പിഴുതു. ആന്‍ഡേഴ്‌സണിന് പുറമെ ടോം ഹാര്‍ട്‌ലിയും രണ്ട് വിക്കറ്റ് പേരിലാക്കി.
നായകനും ഓപ്പണറുമായ രോഹിത് ശര്‍മ്മ (103), മൂന്നാമന്‍ ശുഭ്മാന്‍ ഗില്‍ (110) എന്നിവരുടെ സെഞ്ചുറികളാണ് ആതിഥേയര്‍ക്ക് മികച്ച സ്‌കോറൊരുക്കിയത്. യശസ്വി ജയ്‌സ്വാള്‍ (57), ദേവ്ദത്ത് പടിക്കല്‍ (65), സര്‍ഫറാസ് ഖാന്‍ (56) എന്നിവര്‍ അര്‍ധസെഞ്ചുറികള്‍ നേടി.രവീന്ദ്ര ജഡേജ (15), ധ്രുവ് ജൂറെല്‍ (15), രവിചന്ദ്രന്‍ അശ്വിന്‍ (0), കുല്‍ദീപ് യാദവ് (69 പന്തില്‍ 30), ജസ്പ്രീത് ബുമ്ര (64 പന്തില്‍ 20), മുഹമ്മദ് സിറാജ് (2 പന്തില്‍ 0*) എന്നിങ്ങനെയാണ് മറ്റ് താരങ്ങളുടെ സ്‌കോറുകള്‍. നേരത്തെ ഇംഗ്ലണ്ട് 218 റണ്‍സില്‍ പുറത്തായപ്പോള്‍ 79 റണ്‍സ് നേടിയ സാക്ക് ക്രോലിയാണ് ടോപ് സ്‌കോറര്‍.
