കൊല്ക്കത്ത: തൃണമൂല് കോണ്ഗ്രസില് നിന്ന് രാജിവച്ച മുതിര്ന്ന നേതാവ് തപസ് റോയ് ബിജെപിയില് ചേര്ന്നു. ഞാനും മോദിയുടെ കുടുംബാംഗമാണെന്ന് സാള്ട്ട്ലേക്കിലെ ബിജെപി ഓഫീസില് അംഗത്വം സ്വീകരിച്ചുകൊണ്ട് അദ്ദേഹം പറഞ്ഞു.
നോര്ത്ത് കൊല്ക്കത്ത ബരാനഗറിലെ എംഎല്എ ആയിരുന്ന തപസ് റോയ് കഴിഞ്ഞ ദിവസം ആ സ്ഥാനവും രാജിവച്ചിരുന്നു. രാഷ്ട്രീയത്തില് തുടരുന്ന കാലം വരെയും ബിജെപിയോടൊപ്പമുണ്ടാകും എന്ന് തപസ് റോയ് പറഞ്ഞു.
ബിജെപി സംസ്ഥാന അധ്യക്ഷന് സുകാന്ത മജുംദാറും പ്രതിപക്ഷനേതാവ് സുവേന്ദു അധികാരിയും ചേര്ന്ന് തപസ്റോയിക്ക് പാര്ട്ടി പതാക കൈമാറി. തപസിന്റെ പരിചയസമ്പന്നത ബിജെപിയുടെ മുന്നേറ്റത്തിന് കരുത്താകുമെന്ന് സുവേന്ദു അധികാരി പറഞ്ഞു.
