കൊച്ചി: താലിബാൻ ഭീകരരെ പോലും നാണിപ്പിക്കുന്ന രീതിയിൽ സഹപാഠികളുടെ മുന്നില് സിദ്ധാര്ത്ഥിനെ മൂന്ന് മണിക്കൂര് കെട്ടിയിട്ട് എസ് എഫ് ഐക്കാർ തല്ലിക്കൊല്ലുകയായിരുന്നുവെന്ന് ബിജെപി സംസ്ഥാന അധ്യക്ഷൻ കെ സുരേന്ദ്രൻ. രാഹുല്ഗാന്ധിയുടെ മണ്ഡലമായ വയനാട്ടിലാണ് സംഭവം നടന്നതെങ്കിലും മുഖ്യപ്രതിപക്ഷമായ യുഡിഎഫ് പ്രതികരിക്കുന്നില്ലെന്നും കെ സുരേന്ദ്രന് വിമര്ശിച്ചു.
കേരളത്തില് ഒരു വിദ്യാര്ത്ഥിയെ ആള്ക്കൂട്ട വിചാരണ നടത്തി എസ്എഫ്ഐ ക്രിമിനലുകള് ജീവനെടുത്തിരിക്കുന്നു. പ്രതികളെ പൊലീസ് സംരക്ഷിക്കുകയാണെന്നും കെ സുരേന്ദ്രന് ആരോപിച്ചു. കേരളത്തിലെ ഹോസ്റ്റലുകള് എസ്എഫ്ഐയുടെ കോടതികളായി മാറിയിരിക്കുകയാണെന്നും അദ്ദേഹം ഫേസ്ബുക്കിൽ കുറിച്ചു.
ഫേസ്ബുക്ക് പോസ്റ്റ്:
എസ്എഫ്ഐ ക്രിമിനലുകൾ കേരളത്തിൽ ഒരു വിദ്യാർത്ഥിയെ ആൾക്കൂട്ട വിചാരണ നടത്തി ജീവനെടുത്തിരിക്കുന്നു. സഹപാഠികളുടെ മുമ്പിൽ മൂന്നു മണിക്കൂർ കെട്ടിയിട്ട് താലിബാനികളെ നാണിപ്പിക്കുന്ന രീതിയിൽ തല്ലിക്കൊല്ലുകയായിരുന്നു. പ്രതികളെ സംരക്ഷിക്കുന്നതാവട്ടെ കേരള പൊലീസും. കേരളത്തിലെ ഹോസ്റ്റലുകൾ എസ്എഫ്ഐയുടെ കോടതികളായി മാറിയിരിക്കുകയാണ്. സംഭവം നടന്നത് രാഹുൽഗാന്ധിയുടെ മണ്ഡലമായ വയനാട്ടിലായിട്ടും മുഖ്യപ്രതിപക്ഷമായ യുഡിഎഫ് പ്രതികരിക്കുന്നില്ല. സിപിഎം നേതാക്കളുടെയും സംസ്ഥാന സർക്കാരിന്റെയും തണലിലാണ് എസ്എഫ്ഐയുടെ അഴിഞ്ഞാട്ടമെന്ന് വ്യക്തമാണ്.
