പ്രയാഗ്രാജ്: ബിജെപി സർക്കാരിന്റെ ക്ഷേമപദ്ധതികളും ജനപക്ഷ നയങ്ങളും കാരണം പ്രധാനമന്ത്രി നരേന്ദ്ര മോദിയിലുള്ള കർഷകരുടെയും യുവാക്കളുടെയും വിശ്വാസം ദൃഢമായെന്ന് കേന്ദ്ര ധനമന്ത്രി നിർമല സീതാരാമൻ പറഞ്ഞു. മഹാരാജ്ഗഞ്ച് ജില്ലയിലെ ധ്നേവ ധനേയ് ഗ്രാമത്തിൽ നടന്ന പൊതുയോഗത്തിലാണ് കേന്ദ്രമന്ത്രി ഇക്കാര്യം വ്യക്തമാക്കിയത്.
മോദി സർക്കാർ സാമ്പത്തിക വളർച്ചയ്ക്ക് ആക്കം കൂട്ടിയെന്നും 2027ഓടെ ഭാരതം ലോകത്തെ ഏറ്റവും വലിയ മൂന്ന് സമ്പദ്വ്യവസ്ഥകളിലൊന്നായി മാറുമെന്നും അവർ പറഞ്ഞു. ഭാരതത്തിലെ പ്രതിപക്ഷ സംഘം ശിഥിലമായെന്ന് അവകാശപ്പെട്ട സീതാരാമൻ ഫോട്ടോയെടുക്കുന്നത് കൊണ്ട് ഒന്നും നേടാനാകുന്നില്ലെന്നും പറഞ്ഞു.
കോൺഗ്രസ് നേതാവ് രാഹുൽ ഗാന്ധിക്കും സമാജ്വാദി പാർട്ടി അധ്യക്ഷൻ അഖിലേഷ് യാദവിനും പൊതുജനങ്ങളോട് ഒന്നും പറയാനില്ല. കർഷകർക്ക് വേണ്ടി പ്രധാനമന്ത്രി മോദിയുടെ ഹൃദയത്തിൽ ഒരുപാട് കാര്യങ്ങളുണ്ട്. 10 വർഷം കൊണ്ട് കർഷകർക്ക് വേണ്ടി ഒരുപാട് കാര്യങ്ങൾ ചെയ്തിട്ടുണ്ട്. കഴിഞ്ഞ 10 വർഷത്തിനിടെ ബിജെപി അഴിമതി രഹിത സർക്കാരാണ് നൽകിയതെന്നും അവർ പറഞ്ഞു.
വരുന്ന ലോക്സഭാ തെരഞ്ഞെടുപ്പിൽ ബിജെപിയുടെ വിജയം ഉറപ്പാക്കാൻ അവരെ പ്രചോദിപ്പിക്കുന്നതിനായി അവർ പാർട്ടി പ്രവർത്തകരുടെ യോഗവും നടത്തി.
