തിരുവനന്തപുരം: വാട്ടര് അതോറിറ്റിയുടെ പേരൂര്ക്കട ജലസംഭരണിയില്നിന്നു ശുദ്ധജല വിതരണം നടത്തുന്ന പ്രധാന പൈപ്പ്ലൈനില് ചോര്ച്ച കണ്ടെത്തി. അമ്പലമുക്ക് സാന്ത്വന ജംഗ്ഷനു സമീപം കണ്ടെത്തിയ ചോര്ച്ചയില് അടിയന്തിര അറ്റകുറ്റപ്പണികള് നടത്തുന്നതിനാല് ജില്ലയിലെ നഗര പരിധിയിലെ വിവിധ പ്രദേശങ്ങളില് നാളെ വരെ ജലവിതരണം മുടങ്ങുമെന്ന് കേരളാ വാട്ടര് അതോറിറ്റി അറിയിച്ചു.
ഇന്നു (13/2/2024) വൈകിട്ട് എട്ടു മണി മുതല് 14/2/2024 രാത്രി എട്ടു മണി വരെയാണ് ജലവിതരണം മുടങ്ങുക. പേരൂര്ക്കട, അമ്പലമുക്ക്, കേശവദാസപുരം, പട്ടം, ഉള്ളൂര്, മുട്ടട, നാലാഞ്ചിറ, പരുത്തിപ്പാറ, കവടിയാര്, കുറവന്കോണം, നന്തകോട്, മുറിഞ്ഞപാലം, മെഡിക്കല് കോളേജ് എന്നീ പ്രദേശങ്ങളിലാണ് ശുദ്ധജല വിതരണം തടസ്സപ്പെടുന്നത്.
അതിനാല് ഉപഭോക്താക്കള് ആവശ്യമായ മുന്കരുതലുകള് സ്വീകരിക്കണമെന്ന് വാട്ടര് അതോറിറ്റി നോര്ത്ത് ഡിവിഷന് എക്സിക്യൂട്ടീവ് എഞ്ചിനീയര് അറിയിച്ചു.
