അഗർത്തല: ലോക്സഭാ തെരഞ്ഞെടുപ്പിന് മാസങ്ങൾക്ക് മുന്നേ 73 അംഗ സംസ്ഥാന നിർവാഹക സമിതിയെ പ്രഖ്യാപിച്ച് ത്രിപുരയിലെ ബിജെപി ഘടകം.
മുഖ്യമന്ത്രി മണിക് സാഹ, രാജ്യസഭാ എംപി ബിലാബ് കുമാർ ദേബ്, കേന്ദ്ര സഹമന്ത്രി പ്രതിമ ഭൂമിക്, മുൻ ഉപമുഖ്യമന്ത്രി ജിഷ്ണു ദേവ് വർമ്മ എന്നിവരുൾപ്പെടെ സംസ്ഥാനത്തെ പാർട്ടിയുടെ എല്ലാ മുതിർന്ന നേതാക്കളും കമ്മിറ്റിയിൽ ഉൾപ്പെട്ടിട്ടുണ്ട്. ഇവർക്ക് പുറമെ 14 ക്ഷണിതാക്കളെയും സമിതിയിലുൾപ്പെടുത്തിയിട്ടുണ്ട്.
പാർട്ടിയുടെ സംസ്ഥാന ഘടകത്തിലെ 18 ഭാരവാഹികളുടെ പേരുകൾ ഡിസംബർ 30ന് പ്രഖ്യാപിച്ചിരുന്നു. തെരഞ്ഞെടുപ്പ് മുന്നിൽ കണ്ട് സംസ്ഥാന ബിജെപി മഹിള മോർച്ചയും യുവമോർച്ചയും ഉൾപ്പെടെയുള്ള എല്ലാ മുന്നണി സംഘടനകളുടെയും ഭാരവാഹികളുടെ കമ്മിറ്റികൾ ഇതിനോടകം പുനഃസംഘടിപ്പിച്ചിട്ടുണ്ട്.
